By continuing, you are agreeing to our Terms and conditions as well as our Use of Cookies.

Vier Ongewone Besienswaardighede in die Oos- en Noord-Kaap

Ons reis- en verblyfgidse word al lankal reeds aanbeveel vir mense op soek na die beste, bekostigbaarste, interessantste en luuksste akkommodasie in Suid-Afrika. Natuurlik is die Saterdagoggend- en Sondagoggend-besprekings ook baie gewild, want dan kan jy sommer na videomateriaal kyk van wat daar is om te doen en waarheen om te reis. Die vier plekke hieronder is miskien nou nie iets wat jy in ons akkommodasiegidse sal vind nie, maar nietemin belangrik as jy bietjie avontuurlustig voel en ’n paar van die ongewone besienswaardighede in Suid-Afrika wil besoek:

1.     Die Groot Pynappel in Bathurst

Die Oos-Kaap is ‘n besonderse mooi deel van die land en jy kan van die vreemdste besienswaardighede op jou reis na die onbekende hier vind. Die Groot Pynappel in Bathurst is een van hulle. Bathurst is bekend as die Pynappel-hoofstad van Suid-Afrika en is die trotse staanplek van die grootste nagemaakte pynappel ter wêreld – selfs groter as die een in Australië! Dit is ’n ou watertenk wat in ‘n toeristeaantreklikheid omskep is en is meer as 16 meter hoog. Jy kan ook ’n kort film oor pynappelproduksie binne-in die pynappel sien en so bietjie op die uitkyktoring ontspan. Dit is te Summerhill-plaas op die R67 geleë.


2.     Uilhuis in Nieu-Bethesda

‘n Besoek aan Graaff-Reinet sal nie afgerond wees sonder om ook in Nieu-Bethesda ’n draai te draai om so bietjie by Helen Martins se Uilhuis in te loer nie. Enig in sy soort in Suid-Afrika, huisves die woning ’n aantal glas- en betonstandbeelde. Die tuin is soos ’n sprokieswêreld met kerse, spieëls en lanterns wat strategies geplaas is om lig op spesifieke tye van die dag te weerkaats. Dit is in Martinstraat geleë.


3.     Spinnekopdame van Hanover

In die vêrafgeleë Noord-Kaap is ‘n besoek aan die Spinnekopvrou (of -dame, soos sy ook bekend staan) nog vreemder en vir sommige mense skrikwekkend! Marié de Jager het haar hele woning in ‘n lewende museum vol skerpioen- en spinnekoptuistes omskep. Dink aan ‘n agtvoetige en jy sal dit daar vind, of dit nou ‘n krapspinnekop met sy onaardige ses ogies of ‘n vreesaanjaende knopie is. Jy sal die ongewone museum op die N1 te Driekoppen-plaas nie wil misloop as jy van spinnekoppe hou nie.


4.     Riemvasmaak se Pienk Rooskwartsberg

Moenie net na die Augrabies gaan wanneer jy weer in die Noord-Kaap is nie. Daar naby is ‘n plekkie genaamd Riemvasmaak. As jy ’n 4x4-voertuig het kan jy deur die natuurreservaat reis en die mooiste roospienk kwartskoppie sien. Jy sal ook bobbejaanspieël teen die omliggende kranse kan gewaar. Vra by die Augrabies Natuurreservaat vir aanwysings.


Ontdek nog baie van Suid-Afrika se juwele en lekker-bly akkommodasieplekkies in ons reisgidse. 

Terug na Artikels

Copyright © Ontbytsake 2017 - All rights reserved.  |  Privacy Policy  |  Terms & Conditions
 site