By continuing, you are agreeing to our Terms and conditions as well as our Use of Cookies.

Koningklip en Salm 'Thermidore' op Botterskorsie Carpaccio

Koningklip en Salm 'Thermidore' op Botterskorsie Carpaccio

Bestanddele:
400 g vars koningklipfilette, sonder vel, grof gekap
150 g liggerookte salm of vars salm, sonder vel, grof gekap
1 klein vinkelknol, fyn gekap
100 ml witwyn
100 ml vars room
1 koppie fyn gerasperde First Choice Gouda met Sprietui of sterk Cheddarkaas 
1 Botterskorsie, gebruik net die gedeelte wat nie hol is nie, skil en sny in baie dun wiele
Willow Creek Parmesaangeur olyfolie
1 pakkie Shimeji sampioene of wit knopiesampioene
Botter vir braai van sampioene
Willow Creek Truffelgeur olyfolie

Metode:
Braai eerste jou vinkel in 'n bietjie botter en roer dan albei soorte vis liggies deur. Gooi die wyn by en wag totdat dit kook. Gooi dan die room en helfte van die kaas by, roer deur en skakel af. Braai jou botterskorsieskywe oor matige hitte in botter tot net sag. Geur met sout en Parmesaangeur olyfolie. Braai die sampioene liggies in botter, geur met sout en Truffelgeur olyfolie.

Rangskik die botterskorsie-skywe in 4 borde soos Carpaccio. Deel die vis in 4 en skep in die middel van die botterskorsie Carpaccio. Sprinkel die laaste kaas oor elk en rooster dit bruin onder jou warm oondrooster. Sprinkel sampioene oor en garneer met die groen blaartjies van jou vinkel. 

Wenk: Om dit 'n romantiese voorkoms te gee, skep die vis in'n hartjievormige metaal koekiedrukker, sprinkel die kaas oor en rooster dit dan so in die drukkertjie, wat jy dan versigtig met n braaitang of 'n vadoek van die "viskoekie" verwyder.

Garnaal en Oesterslaai met Kiwi- en Pynappelsalsa

Garnaal en Oesterslaai met Kiwi- en Pynappelsalsa

Bestanddele:
16 - 24 gaar en skoon afgedopte pienk steurgarnale
4 - 8 vars oesters (vra die handelaar om hulle vir jou oop te maak) 
Goeie kruieslaaimengsel of 'n mengsel van jong slaaiblare, bronkors (watercress) en roket
1 vars pynappel, skoongemaak en in fyn dobbelsteentjies gesny
1 ferm, maar ryp kiwivrug, in fyn dobbelsteentjies gesny
4 radyse, in fyn dobbelsteentjies gesny
1 knol vinkel met loof en al, fyngekap

Kiwi konserf: 
Sny twee tot 3 kiwivrugte in dobbelsteentjies, plaas in 'n kastrol en voeg 3 eetlepels suiker en 3 eetlepels suurlemoensap by. Kook liggies en laat afkoel.
Willow Creek Balsemiekasyn
Willow Creek Suurlemoengeur olyfolie 
2 lemmetjies
Gepiekelde Rooi ui

Metode:
Maak jou salsa deur die pynappel, kiwi, vinkel en radys te meng met genoeg Suurlemoengeur olyfolie en balsemiekasyn. Hou in die yskas tot gebruik. 

Was die oesters skoon sodat daar geen skulp in is nie en maak seker elke oester is losgemaak van sy skulp deur die suiervoetjie los te breek. Skep 'n klein bietjie kiwi-konserf oor elke oester en drup lemmetjiesap oor. Geur met sout en swartpeper. Hou in die yskas tot net voor bediening.
Pak 'n hopie slaaiblare in 'n  mooi bakkie vir elke gas en rangskik die garnale daarop saam met die oesters. Skep van die kiwi-pynappel salsa oor die garnale en slaaiblare.

Mielieblom-melktert met Klappermeelkors

Mielieblom-melktert met Klappermeelkors

Bestanddele:
Kors:
1.5 k klappermeel (kan ook amandelmeel gebruik)
Sout
2 E versiersuiker
100 g koue botter, in dobbelsteentjies gesny
1 ekstragroot eier
Klein bietjie yswater
Willow Creek Blood Orange geur olyfolie, om pannetjies te smeer
Bakboontjies en bakpapier

Vulsel:
1.5 k volroommelk
1 kaneelstokkie
2 ekstragroot eiers, geskei
½ k versiersuiker
2 ml sout
Goeie vanieljepasta of saadjies van 1 peul
2 ml amandelgeursel
½ k room
¼ k mielieblom (Maizena)
2 E botter
Ekstra gesifte versiersuiker en fyn pypkaneel
Vye en bessies vir garnering of ander vrugte in seisoen

Metode:
Kors:
Pols die klappermeel, sout en botter in jou voedselverwerker totdat dit 'n growwe krummeltekstuur het. Breek die eier by en pols weer. Voeg 2 eetlepels yskoue water by en pols weer ‘n paar keer. Smeer jou losboom-tertpan of individuele tertpannetjies met Willow creek Blood Orange olyfolie. Druk die deegkrummels met jou vingerpunte vas in die pan en om die kante. Voer met bakpapier uit en vul met bakboontjies. Bak in voorafverhitte oond net vir 8 minute by 190 grade Celcius. Laat rus tot benodig maar hou die oond op 190 grade aan.

Vulsel:
Verhit die melk saam met jou kaneelstokkie tot net onder kookpunt en verwyder dan die kaneelstokkie. Meng die room, eiergele, versiersuiker, mielieblom, vanielje en amandelgeursel goed. Giet ‘n bietjie van die warm melk by die mielieblom-mengsel en roer deur, sodat dit ‘n loperige mengsel vorm. Roer die mengsel nou stadig by die warm melk oor lae hitte totdat dit ‘n dik melkpap vorm. Roer die botter by en laat afkoel tot kamertemperatuur. Klits eierwitte goed styf en vou deur die melkpap. Vul die tertkors met die melkpap en sprinkel mildelik met die versiersuiker en kaneel.

Bak groot tert by 190 grade vir 10 minute en verlaag die temperatuur na net onder 180 en bak nog 15 minute. Individuele tertjies bak 5 min by 190 en 10 tot 15 min by 180 grade. Garneer wanneer genoegsaam afgekoel met vars vrugte of geniet hom net so.

Russiese Borsch met Suurroom en Kaasbrood

Russiese Borsch met Suurroom en Kaasbrood

Bestanddele:
4 dik snye beesskenkel met murgbene
Bietjie koekmeel om die vleis te besprinkel
Sout en peper
1 ui 
1 wortel
1 selderystokkie
2 vars lourierblare of 1 gedroogde lourierblaar
3 L water

2 mediumgroot aartappels, geskil en in dobbelsteentjies gesny
1 halwe koolkop, fyn opgesny

4 groot beetknolle, gerasper
1 groot ui, gekap
2 geelwortels, gerasper
2 mediumgroot tamaties, dobbelsteentjies gesny
Olyfolie vir braai en gegeurde botter soos ‘n First Choice se kruiebotter of knoffelbotter
1 vars lourierblaar

200 ml First Choice room
Sap van 1 suurlemoen
1 bossie vars dillekruid
1 bossie platblaar pietersielie

Brood: 
1 kg supermark brooddeeg
1 koppie gerasperde, gegeurde Goudakaas soos First Choice green onion plus ‘n bietjie ekstra vir bo-oor sprinkel

Metode:
Begin deur die vleis goed te geur met sout en peper en dan te sprinkel met koekmeel. Braai die vleis bruin in ‘n swaarboomkastrol wat ‘n stewig-passende deksel het. Sny die geurgroente net grof op en sit by die vleis in die kastrol. Voeg die lourierblaar by en giet die water oor. Plaas die deksel op en kook stadig vir 1.5 tot 2 ure. Verwyder die vleis versigtig uit die aftreksel en hou eenkant. Giet die afteksel deur ‘n sif en hou net die vloeistof weer in die kastrol. Plaas nou die kool en aartappel by die aftreksel en kook vir so 20 minute. 

Intussen braai jy die gekapte ui, gerasperde wortel en beet en die gesnyde tamatie saam in ‘n pan met bietjie olyfolie en geurbotter. Stowe dit vir so 10 minute met ‘n deksel op die pan en meng dit dan by die koolmengsel. Kook nog ‘n verdere 30 minute oor mediumhitte.

Berei suurroom voor deur suurlemoensap met die room te meng. Kap die dillekruid en pietersielie fyn. Bedien deur die sop in sopbakkies te skep en vir elk ‘n goeie klompie suurroom bo-op, met vars kruie oorgesprinkel.

Brood:
Berei ‘n bakplaat voor deur dit met koekmeel te sprinkel. Druk die deeg mooi eweredig plat oor die bakplaat en bedek die hele oppervlak met die gerasperde kaas. Rol van een kort kant af versigtig op, maar rol mooi styf sodat jy nie lugblase skep nie. Vorm die broodjie mooi en sprinkel dalk nog ‘n bietjie kaas bo oor.

Bak 50 minute by 180 tot 190 grade.

Beesfilet met Goulash-sous en Duitse Pastaspatsels

Beesfilet met Goulash-sous en Duitse Pastaspatsels

Bestanddele:
150 – 200 g beesfilet per persoon, geur met sout en peper en smeer met olyfolie
3 kleure soetrissie of net rooi, klein dobbelsteentjies gesny
2 E paprika
Willow Creek Knoffelgeur olyfolie
Of 2 huisies knoffel, gekneus en gekap
1 mediumgroot ui, gekap
1 mediumgroot tamatie, klein dobbelsteentjies gesny
Bietjie water

SPAETZLE (Pastaspatsels):
1.5 k koekmeel
1 t Sout
2 eiers
1.25 k melk
Kastrol met kookwater, gesout
60 g gesoute botter

Garnering: mooi sampioentjies

Metode:
Verbruin die heel filet na jy dit gegeur en olie gesmeer het, in ‘n warm pan. Plaas dit in 'n lou oond om te rus terwyl jy aangaan.

Maak die Goulash-sous:
Soteer uie en soetrissies liggies in die knoffelgeur olie. Sit die tamaties by en plaas ‘n deksel op die pan. Soteer vir ‘n paar minute en voeg die paprika by. Geur goed met sout en peper. Sit klein bietjie kookwater by en stoom die sous totdat dit alles sag is en mooi bymekaarkom. Jy kan tussendeur net loer en dalk weer ‘n bietjie water bysit.

Maak die Pastaspatsels:
Verhit die water tot kookpunt en hou op medium hitte. Plaas die koekmeel en sout in ‘n groterige mengbak. Maak ‘n holte in die meel en breek die 2 eiers daarin. Roer in die middel van die eiers versigtig sodat die meel van die kante af geleidelik ingewerk word. Voeg bietjies bietjies melk by. Hou ‘n bietjie ekstra meel byderhand. Wanneer die deeg lekker sag en hanteerbaar, maar nie taai is nie, kan jy ‘n rasper gebruik en die deeg oor die kokende water rasper sodat daar kein stukkies in die kookwater val. Die spatseltjies kom na die oppervlak wanneer dit gaar is. Skep uit met ‘n gaatjeslepel en braai dit liggies in botter in ‘n pan.

Opdiening:
Wanneer die vleis mooi  ferm maar nog sag is, kan jy dun snytjies sny en bo-oor porsies spatselpasta rangskik. Braai die sampioene bruin in die pan waarin die vleis verbruin is.
Skep sous bo-oor die vleis en garneer met sampioene.

Wenk:
First Choice se Swartpepergeur Baby Gouda bo-oor gerasper, smaak vorentoe.

Beestert met Rooiwyn en Sjokolade op Geskeurde Pastalinte

Beestert met Rooiwyn en Sjokolade op Geskeurde Pastalinte

Bestanddele:
Beesstert:
1 kg beesstert
1 wortel
1 ui
1 selderystingel
Sout en peper
100 g donker sjokolade
5 ml Sjinese vyfspeserymengsel of ‘n mengsel van kaneel, steranys, koljander, naeltjies en neutmuskaat
2 jenewerbessies (opsioneel)
1 koevertjie tamatiepasta
6 selderystingels, draadjies afgetrek en in stukkies gesny
150 ml rooiwyn
100 ml sultanas
1 bossie platblaar of Italiaanse pietersielie
1 bossie basiliekruid
4 eetlepels dennepitte

Pastalinte:
200 g koekmeel
2 groot eiers
Botter of kruiebotter

Metode:
Beesstert:
Kook die beesstert sag saam met die wortel, ui en selderystingel en geur dit goed met sout en peper. Gooi die helfte van die aftreksel af, nadat jy die boonste olie versigtig afgeskep het. Hou die aftreksel eenkant indien jy later jou sous wil aanvul. Voeg die sjokolade, tamatiepasta, speserye en rooiwyn by die vleismengsel, saam met die gekerfde seldery en kook dit af totdat dit ‘n ryk donker sous vorm. Jy kan dit ontbeen of heel hou, na keuse. Maak ‘n mengsel met die sultanas, dennepitte, gekapte pietersielie en basiliekruid om laaste oor alles te sprinkel.

Pastalinte:
Maak die pastalinte, deur n deeg te vorm in jou voedselverwerker met die meel en eiers.
Rol die deeg deur die pastamasjien totdat jy mooi hanteerbare pastavelle het. Moenie tot by die dunste stelling rol nie. Skeur dan met die hand langwerpige linte ongeveer 2cm breed en kook net 3 - 4 minute in sterk gesoute kokkwater. Verwyder uit die water. Meng met botter en skep in opdienbakkies, met beesstertsous bo oor. Sprinkel laastens mildelik met die kruie en sultanasprinkel.

Vars Vye met Hangopkaas, Okkerneute en Beet

Vars Vye met Hangopkaas, Okkerneute en Beet

Bestanddele:
Vir die Hangopkaas:
500 ml volroom/dubbelroom of Griekse jogurt
5 ml sout
1 mediumgroot beet, rou of gekook, in dun sirkels gesny
Katoen- of moeselienlappie van ongeveer 45 cm x 45 cm
Kombuistou of rekkie
Lang Sosatiestokkie

2 vye per persoon (vervang met nektarien of sagte perskes)
1 mediumgroot beet per persoon, rou of gaar, in papierdun skywe gesny
Avokadopuree gemaak met avokado, sout en olyfolie.

100 g okkerneute
Kruiesout
10 ml suiker

Vir die sous:
1 ekstra beet, gekook, of 2 E gebottelde beet
100 ml Willow Creek Balsemiekasyn
30 ml Willow Creek ekstra suiwer olyfolie

Metode:
Vir die Hangopkaas:
Meng die jogurt/room en sout goed. Voer 'n mengbakkie uit met die moeseliendoek. Plaas beetskyfies onder in die holte en giet die gemengde jogurt/room oor. Bring die punte van die doek bymekaar en maak dit in ‘n bondeltjie vas met tou of ‘n rekkie. Steek die sosatiestokkie deur die tou en balanseer die hangkaas oor ‘n beker en plaas dit in die yskas vir 5 dae. Giet elke dag die uitdrupvog af. 

Rooster die neute, besprinkel met suiker en kruiesout, tot hulle blink is en effens donkerder van kleur.

Vir die Sous:
Meng die heel gekookte beet of botteltjie beet met die asyn en olyfolie en meng dit goed glad met jou staafmenger.

Sny die helfte van die vye in dun skyfies. Rangskik dit saam met die beetskywe in sirkelvorm op mooi opdienborde. Sny die orige vye ‘n kruisie oorlangs aan die bokant na jy die stingeltjie weggesny het. Druk liggies met jou vingers sodat die vy oopblom. Druk ‘n bietjie avokadopuree in die middel van die beet en vyesirkel en plaas die heel vyeblom daarop. Sprinkel met die geroosterde neute en bedruip met die beet en balsemieksous. Bedien die kaas op ‘n mooi plank of teel sodat gaste dit vir mekaar aangee. 

Bief Estofado met geurige Mielierys

Bief Estofado met geurige Mielierys

Bestanddele:
1.2 kg beesskenkels met murgbene of beeskortrib-stukkies en 4 murgbene met murg ekstra
1 groen soetrissie, ontpit en opgesny
1 rooi soetrissie ontpit en opgesny
1 groot ui, grof gekap
80 g koevertjie tamatiepasta
1 blikkie gekapte tamatie
30 ml paprikapoeier
200 ml rooiwyn
10 ontpitte olywe
Ongeveer ‘n handvol gedroogde perskes of appelkose
2 E pitlose rosyne
Sout en peper
30 ml Willow Creek Knoffelgeur olyfolie 
1 bossie vars tiemie

Vir die mielierys:
1 k rou mielierys
3 k water
1 E sout
4 repies streepspek, in klein stukkies gesny
1 mediumgroot ui, opgekap ongeveer so groot soos die spekstukkies
Genoeg vars pietersielie na smaak, fyn gesny sonder stingeltjies

Metode:
Braai die vleisstukke en die murgbene bruin in ‘n swaarboom-stowekastrol wat ‘n goedpassende deksel het. Hou die vleis en die murgbene eenkant.

Braai die uie en soetrissies vinnig en plaas die vleis terug in die kastrol. Hou steeds die murgbene eenkant vir laaste. Voeg die tamatie en tamatiepasta by. Geur met sout, peper en paprika. Vul aan met kookwater totdat die mensel onder water is en stowe stadig vir ten minste een uur. Vul die water aan as die vog begin min raak.

Voeg na ‘n uur die vrugte, olywe en wyn by en stowe vir ‘n verdere halfuur totdat alles baie sag is. Sowat 15 minute voor die kooktyd verstreke is, plaas die murgbene terug in die stowegereg en sit dan die bossie vars tiemie by. Verwyder die tiemiebossie in geheel voor bediening.

Vir die mielierys:
Kook die mielierys in die drie koppies water vinnig vir ongeveer 12 tot 15 minute. Spoel dit dan in ‘n sif onder lopende kouewater af. Plaas terug in die kastrol en voeg net genoeg warm water by om die rys te bedek sodat daar ongeveer 5 mm water bokant die rys is. Sprinkel 10 ml sout oor en plaas met ‘n deksel terug op medium hitte om sag te stoom. Moenie roer nie. Braai spek en ui in die braaipan net net gaar en meng dit liggies deur die gaar mielierys, saam met die vars gesnipperde pietersielie.

Arancini - Rooiwyn-risotto Rysballetjies met Ryk Kaassous

Arancini - Rooiwyn-risotto Rysballetjies met Ryk Kaassous

Bestanddele:
1 k Arborio-rys
1 ui, fyngekap
3 E botter of First Choice knoffelbotter
3 E Willow Creek Olyfolie
1 k rooiwyn
3 k sterk hoenderaftreksel
50 g Peccorinokaas, gerasper
1 First Choice Baby Gouda met rissie
2 repies ontbytspek, fyn gesnipper en bros gebraai
1 eier, in 'n bakkie gebreek en effens geklits
150 ml gedroogde broodkrummels
150 ml olyfolie of kookolie
2 E botter
1 k First Choice gerasperde Cheddarkaas
250 ml First Choice Langlewe room

Metode:
Braai die ui in die olyfolie en botter liggies oor matige hitte in 'n swaarboompan. Voeg die Arborio-rys daarby. Roer goed, sodat die korrels goed bedek is en liggies begin braai. Wanneer die korrels aan die punte begin deursigtig raak, kan jy die helfte van die wyn en 1 koppie aftreksel byroer. Hou aan roer totdat die vloeistof byna heeltemal geabsorbeer is. Voeg nou die ander helfte van die wyn en nog 'n koppie aftreksel by. Roer weer aanhoudend liggies rond totdat ook hierdie vloeistof ingeneem is. Roer die laaste koppie aftreksel by. Nou kan jy begin toets of die ryskorrels sag, maar nog effens "neuterig" heel in die middel is. Kookproses neem ongeveer 40 minute. Indien jy voel die rys is nog nie sag genoeg nie, kan jy nog aftreksel of kookwater byvoeg. Roer deurgaans. Die ryskorrels moet nie eintlik stil gaan lê nie. Roer laastens die gerasperde Peccorino deur en laat in die yskas koud word.

Sny van die Baby Gouda sodat jy 16-20 dobbelsteentjies het van ongeveer 1 cm. Neem dan 'n bietjie risotto in jou handpalm en druk 'n kaasblokkie in die middel. Plaas nog n klein bietjie Risotto bo-oor en rol versigtig 'n balletjie van ongeveer gholfbal-grootte. Plaas in die yskas vir 20 minute om stewig te vorm.

Meng die broodkrummels en spek goed in 'n voedselverwerker en gooi dit uit in 'n groterige bord of skotteltjie. Verhit die 150 ml olie en 2 eetlepels botter tot matig warm. Rol elke bolletjie in eier en dan in die spekkrummels. Braai hulle so 4 of 5 tesame mooi goudbruin in die botter en oliemensel.

Vir die kaassous:
Verhit die room tot net onder kookpunt en roer al die gerasperde Cheddar gelyktydig by totdat dit 'n gladde kaassous is.

Driegangontbyt

Driegangontbyt

Voorgereg: Vrugte- en Granolatertjie; 
Hoofgereg: Ontbytpotjie 
Nagereg: Sjokolade en Lemoen Kroek bakbrood met First Choice Sjokoladevla

Vir die Granolakorsie:
250 g Granola of muesli
100 g sagte of gesmelte botter

Vrugte en bessies van jou keuse, asook jong worteltjies en ertjies as jy so gewaagd wil wees
Klein bietjie suiker en botter vir verglansing 
Kruisementblaartjies as garnering
Opsioneel: Volroom joghurt en heuning

Vir die Ontbytpotjie:
300 ml First Choice room
250 g gekapte ontbytspek
1 medium ui, fyngekap
6 sampioene, fyngekap
4 eiers
Fyn gerasperde First Choice Baby Gouda met Swartpeper 
Willow Creek Truffelgeur olyfolie 

Vir die Sjokolade en Lemoen Kroek Bakbrood:

1 bol supermark brooddeeg (vetkoekdeeg) 
200 g heelneut melksjokolade of donkersjokolade
Willow Creek Blood Orange geur olyfolie 
Klein bietjie koekmeel

First Choice Sjokoladevla, yskoud verkoel en styf geklits

So maak mens:
Vir die Vrugte- en Granolatertjies:
Maak die tertkorsies die aand voor die tyd of ten minste 2 ure voor die tyd. Meng die Granola of muesli goed met die botter en druk dit oor die boom en teen die kante van 'n losboombakpannetjies tertpannetjie of Muffin pannetjie goed vas. Plaas in die yskas totdat jy gaan opdien. Sny die vrugte mooi op en hou eenkant kant. Verglans jou worteltjies en heel ertjies vinnig deur dit in 'n warm pan te skud saam met botter en 'n bietjie suiker, indien jy dit gebruik. Pak die tertdoppies mooi vol en rond af met joghurt, heuning  en kruieblaartjies. 

Vir die ontbytpotjies:
Braai die gesnipperde spek, uie en sampioene in botter bruin en skep in individuele oondvaste bakkies. Deel die room in vier en gooi oor die spekmengsel in elke bakkie. Breek 'n eier in  elk en strooi genoeg kaas oor elkeen. Drup 'n bietjie Truffelgeur olyfolie oor en plaas dekseltjie op die potjie of bedek met foelie. Bak vir ongeveer 12 tot 15 minute by 180 grade Celcius. Bedien saam met roosterbrood en slaai. 

Vir die Kroek Bakbrood:
Sprinkel 'n werksoppervlak met koekmeel. Druk die deeg goed plat in 'n ronde sirkelvorm. Breek die sjokolade in blokkies en versprei oor die deeg. Drup Willow Creek Blood Orange geur olyfolie bo oor. Rol  nou die deeg van een kant af lekker styf op en probeer om nie lugblase te skep nie so druk lekker styf terwyl jy rol. Vou die kante om en plaas op 'n bakplaat met die naat na onder. Bak vir 30 minute by 190grade Celcius. Bedien saam met die opgeklitste First Choice Sjokoladevla en heerlike boeretroos. 

Pisaladiere, Groenmielies met Olyfsout en Sjokolade- en olyfterrien

Pisaladiere, Groenmielies met Olyfsout en Sjokolade- en olyfterrien

Bestanddele:
Pisaladiere:
1  Vel skilferdeeg, rol dit om jou pan te pas. 
1 Rooi ui, in dun skywe gesny
1 pakkie rooi sprietuie, fyngekap
Botter en olyfolie vir braai van uie
8 ansjovisstukkies, elk in die lengte in twee verdeel
Ontpitte swart olywe in halwes gesny

Olyfsout:
Ongeveer 6 elk ontpitte groen en swart olywe
2 eetlepels fyn sout
1 eetlepel pienk Himalaya soutkorrels
Groenmielies nog in skille

Sjokolade- en olyfterrien:
200 g witsjokolade
100 ml room
200 g donkersjokolade
1 eier
50 g botter
100 ml room
1 pakkie Oreo of soortgelyke sjokoladebeskuitjies
50 g sagte botter
Ongeveer 12 ontpitte swart olywe
1 houertjie frambose of bloubessies

Metode:
Pisaladiere:
Voer 'n geskikte pan uit vir jou Pisaladiere met skilferdeeg. Braai die uie en sprietuie stadig sag en ietwat gekarameliseerd in botter. Sprei die uie oor die deeg. Lê die ansjovisrepies in 'n ruitontwerp oor die hele pizza. Plaas 'n halwe olyf in elke ruitjie. Bak by 180 grade vir 25 minute. 

Vir die groenmielies met olyfsout:
Droog die olywe stadig in 'n oond deur hulle op koerantpapier op 'n bakplaat teen ongeveer 70 grade te laat lê. Plaas dit saam met al die sout in n voedselverwerker en pols tot fyn. Stoom die mielies eers gaar nog in die skil, los net een laag skille om die mielies. Trek een kant oop en braai die mielies op die vuur of in 'n pan bros. Sprinkel olyfsout oor en bedien met botter vir elke gas.

Vir die Sjokolade- en olyfterrien:
Pols die sjokoladekoekies fyn en meng met sagte botter. Druk die krummels oor die bodem van 'n broodpannetjie wat jy vooraf met kleefplastiek uitgevoer het, goed vas. Plaas in jou vrieskas terwyl jy die res maak. Smelt die witsjokolade en 100 ml room  saam in jou mikrogolfoond. Roer na elke 30 sekondes, totdat dit mooi glad is. Verdeel die witsjokolade ganache in 2 en meng die olywe met die een helfte en die bloubessies met die ander helfte. Smelt die donkersjokolade, botter en 100 ml room saam. Roer ook elke 30 sekondes sodat dit 'n gladde mengsel vorm. Roer dan die eier deur die warm mengsel. Giet die witsjokolade en olyfmengsel oor die koekiekors. Verkoel vir 10 minute. Smeer dan die donker sjokoladeganache bo-oor die eerste wit laag. Verkoel weer vir 10 minute. Verhit die oorblywende witsjokolade-mengsel effens en smeer dit laastens versigtig oor die donker ganache in die broodpannetjie. Vries oornag en hou baie koud (amper gevries) totdat jy dit met 'n warm mes gaan sny en bedien.

Aspersie- en Hoenderslaai met Suid-Oos Asiese Klappermelksous

Aspersie- en Hoenderslaai met Suid-Oos Asiese Klappermelksous

Bestanddele:
4 of 8 hoenderdytjies (vir 'n laevet-ete, gebruik hoenderfilette)
Willow Creek Koljandergeurolie 
Willow Creek Jalapeno-olie (opsioneel, vir 'n byt)
50 ml sojasous
Swartpeper

1 bossie groen aspersies, 4 minute gestoom en dan onmiddellik met ys of yswater afgekoel
Mooi slaaiblare
Rooi en geel soetrissies in fyn dobbelsteentjies gesny
Kersietamaties of geel tamaties

Slaaisous:
1 bossie vars groen koljanderblare
2 cm stuk vars gemmerwortel, fyn gerasper
1 toontjie vars knoffel, gekneus en grof gekap
80 ml ligte sojasous
150 ml klappermelk
1 nie te warm groen brandrissie, saadjies en nukleus mooi uitgeskraap, grof gekap
Skil en sap van 2 lemmetjies

Metode:
Pak die hoenderstukke in 'n oondvaste braaipan. Geur die vleis goed met beide olies en sprinkel die sojasous en swartpeper bo oor. Bak hulle ongeveer 25 minute tot gaar en bruin in 'n matige warm oond, ongeveer 180 grade C. Hou eenkant.

Slaaisous:
Maak die sous deur al die bestanddele goed saam te verwerk in 'n versapper. Pak die slaai in 'n mooi vorm op individuele opdienborde en plaas een of twee hoenderstukke per persoon heel bo-op. Giet mildelik van die klappermelksous oor. Sprinkel die rooi en geel soetrissie dobbelsteentjies bo-oor en rondom.

Pangeroosterde vars Tuna met Oosterse Pynappelsous

Pangeroosterde vars Tuna met Oosterse Pynappelsous

Bestanddele:
500 g vars tuna-steak
Olyfolie 
Sout en Peper
Sous
1/2 pynappel, fyn dobbelsteentjies gesny
2 cm vars gemmer, gerasper
Klein stukkie vars rissie, of soveel na smaak, fyn gesny
1 bossie vars koljanderblare, fyn gesny
100 ml sojasous
10 ml sesamolie
15 ml Willow Creek Koljandergeur olyfolie
5 ml suiker
Geroosterde sesamsaadjies vir oor sprinkel
Sjinese glasnoedels of rysnoedels
1 klein pakkie bevrore ertjies, ontdooi
Willow Creek Truffelgeur olyfolie
Ertjielote 

Metode:
Maak eers die sous deur al die bestanddele te meng. Laat staan eenkant, nie in yskas. Gebruik die helfte van die pakkie ertjies en maak ‘n puree met jou stokmenger deur die ertjies met sout en Willow Creek se truffelgeurolie te meng Hou die res van die ertjies byderhand, geur met sout.

Bring ‘n kastrol gesoute water tot kookpunt en plaas die noedels in die kookwater. Skakel die hitte af.

Verwarm ‘n braaipan tot matige hitte. Droog die tuna-steak met kombuispapier af en smeer dit alkant goed met olyfolie. Braai die vis alkant mooi bruin. Pasop dat jy dit nie heeltemal gaarmaak nie, dan is dit baie droog.

By opdiening:
Plaas ‘n hopie noedels in voorafverwarmde opdienborde. Sny die Tuna in skywe van ongeveer 5 mm en rangskik dit oor die noedels. Plaas ertjiepuree langsaan en sprinkel met die heel ertjies. Plaas laastens ertjielote bo-op. Skep van die pynappelsous bo-oor die vis, sprinkel met geroosterde sesamsaadjies en bedien.

Copyright © Ontbytsake 2017 - All rights reserved.  |  Privacy Policy  |  Terms & Conditions
 site