By continuing, you are agreeing to our Terms and conditions as well as our Use of Cookies.

Fritto Misto di Mare met Tartaresous

Fritto Misto di Mare met Tartaresous

Bestanddele:
Fritto Misto:
seekos soos Calamari-ringe, utgedopte rou garnale, Calamari-buisies, blokkies ferm wit vis
B-Well olie vir diepbraai
200 g bruismeel
1 t sout
1 t koeksoda
ongeveer 200 - 250 ml yswater of yskoue sodawater (sodawater maak dit ekstra pof en bros)

Tartaresous:
200 ml B-Well mayonnaise
50 ml suurlemoensap
1 t suiker
1 E baie fyngekapte ui
1 t fyn gesnipperde rooi soetrissie
4 kappertjiesade, fyn gesnipper
4 gekneusde, ingemaakte groenpeperkorrels
2 ml braaispeserye
fyngesnipperde vars rissie na smaak, opsioneel

Metode:
Meng die sout en bruismeel in ‘n mengbak. Maak ‘n loperige, maar nie te dun, beslag met die yswater of sodawater deur die meel en vloeistof stadig te begin meng met ‘n ballonklitser. Verhit die olie tot mediumwarm (180 grade Celcius). Doop die seekos een vir een in die beslag en laat dit net effens afdrup voor jy dit in die warm olie laat sak. Moenie te veel stukkies op ‘n slag in die olie sit nie. Braai hulle pof en bruin. Laat die stukkies dreineer op kombuispapier. Bedien so gou moontlik saam met tartaresous.

Lams-braairibbetjies met Ansjovis-aartappels

Lams-braairibbetjies met Ansjovis-aartappels

Bestanddele:
12 -16 los lamsribbetjies
15 ml B-well Knoffelgeur Canola-olie
sout
swartpeper
12 -16 baba-aartappels, sag gekook in soutwater en net afgekoel
4 E B-well Thick and Creamy Canola Mayonnaise 
80 ml First Choice volroommelk
4 - 8 heel ansjovissies
1 E kappertjiesade
kropslaai
agurkies of tuisgemaakte piekels


Metode:
Sout die ribbetjies goed en maal swartpeper oor. Rangskik hulle op ‘n bakplaat en sprinkel liggies met knoffelgeur olie. Plaas in ‘n baie warm (220 grade) oond op die middelste rak en bak vir sowat 40 minute tot brosgaar.

Verpulp die ansjovis, melk en mayonnaise. Kap die Kappertjiesade fyn en roer deur die mayonnaise-sous. Giet oor die gaar aartappeltjies. Sny die agurkies of piekels in klein dobbelsteentjies en gebruik om bo-oor die aartappels met sous te sprinkel.

Bedien alles saam met bros kropslaai. 

Varklies met Oosterse Vyfspeserye, Wit Nektariens en Pak Choy

Varklies met Oosterse Vyfspeserye, Wit Nektariens en Pak Choy

Bestanddele:
1 x varklies van ongeveer 2 kg
15 ml Oosterse vyfspeserymengsel
15 ml B-well suurlemoengeur kanola-olie

4 witvlees Nektariens
1 k geurige witwyn
15 ml suiker
15 ml koue botter, in blokkies gesny

2 bossies Pak Choy Chinese kool
15 ml B-well  soteerolie
50 ml sojasous

Metode:
Sny die liesvel in 1 cm repe tot op die vleis. Vee die vel goed droog en sprinkel met sout. Vryf die vleiskant met die vyfspeserymengsel en suurlemoengeur-olie. Plaas in ‘n oondvaste bak met die velkant na bo. Bedek met foelie en bak stadig by 160 grade vir 1 uur. Verwyder die foelie en verhoog die temperatuur na 220 grade Celcius sodat die vel mooi krakerig bak (blasies moet vorm).

Sny die nektariens aan die bokant elk ‘n kruisie oorlangs met ‘n skerp mes. Plaas die perskes in ‘n pan met ‘n goedpassende deksel. Giet die koppie wyn oor hulle en sprinkel die suiker oor. Plaas op matige hitte met die deksel oor en posjeer vir 20 minute. Roer die botterklontjies deur en laat afkoel.

Soteer die Pak Choy net losgeskeur van die bossie vir een tot 2 minute in ‘n warm pan en sprinkel met sojasous.

Geroosterde Wildsboudjie met Milk Stout-Sampioensous

Geroosterde Wildsboudjie met Milk Stout-Sampioensous

Bestanddele:
1 klein tot medium grootte wildsboudjie, netjies ontbeen en oopgevlek (1.5 - 2.2 kg)
500 ml karringmelk of melk met suurlemoensap aangesuur
3 jenewerbessies (Juniper berries)
6 heel kruienaeltjies (cloves)
6 heel swartpeperkorrels
10 ml grof gemaalde of gestampde koljandersaad
50 ml B-well olyfolie

200 g gemengde sampioene, gesny
1 kleinerige ui, fyn gekap
15 ml B-well knoffelgeur kanola-olie
1 potjie biefaftrekseljellie
200 ml Castle Milk Stout swartbier
50 ml rooiwyn
50 ml koue First Choice botterblokkies

Metode:
Meng die speserye met die karring- of suurmelk. Laat lê die vleis oornag daarin, in 'n plastiekbak met deksel, in die yskas. 

20 minute voor bediening: Verwyder die vleis uit die melk en vee dit goed af. Smeer die vleis alkant goed met olyfolie. Verhit 'n geriffelde yster steakpan goed en verbruin die vleis alkante vir ten minste 6 minute op elke kant voor jy dit draai.

Verhit die oond tot 160 grade Celcius en laat rus die vleis in die oond vir sowat 19 tot 15 minute.

Maak intussen die sous: Braai die sampioene en uie in die knoffelgeur olie net sag en voeg dan die res van die bestanddele, behalwe die botter, by. Laat indamp tot dit begin verdik en verwyder dit van die hitte. Roer die koue botter deur.

Sny die vleis skuins oor die grein (nooit saam met die grein nie) in dun skyfies en sit dit in die warm sampioensous. Bedien saam met aartappeltjies wat met Parmesaankaas gesprinkel en gerooster is. 

Pêrelgort in Vyeblaar en Klappermelk met Hoenderborsies

Pêrelgort in Vyeblaar en Klappermelk met Hoenderborsies

Bestanddele:
4 hoenderborsfilette
30 ml botter
3 mediumgrootte vars vyeblare
1 410 g blik klappermelk
Sout
Vars kruie soos salie, pynappelsalie of basiliekruid 
1 ½ k pêrelgort 
Suurlemoengeur B-well Kanola-olie
200 ml witwyn
2 k water of groente- of hoenderaftreksel 
Vars vye en appelliefies vir afronding
30 ml heuning

Metode:
Braai die droë pêrelgort in ‘n klein bietjie olyfolie oor mediumhitte tot al die korrels mooi met olie bedek is en effens verbruin. Voeg die helfte van die klappermelk, die wyn en 1 koppie water of aftreksel by. Plaas 2 vyeblare bo-op die gort en plaas 'n deksel op sodat die gort stadig stowe  Vul die vloeistof aan met water of aftreksel tot die gort sag, maar nog ferm is.

Braai die hoender alkante goudbruin in botter en suurlemoengeurolie. Geur met sout en voeg die kruie van jou keuse, asook die ander helfte van die klappermelk by. Plaas ‘n deksel op die pan en posjeer die borsies vir sowat 20 minute. Verwyder die vleis uit die vloeistof en laat die vloeistof vinnig opkook sonder die deksel om in te damp. Wanneer dit verdik, roer ‘n bietjie koue botter by en verwyder van die hitte.

Rooster die vye en appelliefies vir 'n paar minute onder ‘n warm rooster met sout en heuning. 

Bedien die hoender in mooi dun skyfies op die pêrelgort saam met ‘n vy en appelliefies.

Polenta Gnocchi met Salm in Lemmetjie-room en Vars Tamaties

Polenta Gnocchi met Salm in Lemmetjie-room en Vars Tamaties

Bestanddele:
3 K melk
1 t sout
100 g botter
1 K Semolina (koring) of fyn mieliemeel
1 K gerasperde Parmesaankaas
4 eiergele

350 g vars salm (in groterige dobbelsteentjies gesny)
B-well suurlemoengeur Kanola-olie vir braai
1 knoffeltoontjie, gekneus en gekap
2 lemmetjies
100 ml witwyn
150 ml First Choice langleweroom
1 E groenpeperkorrels (opsioneel)
Sout en peper
1 pakkie gemengde kleure tamaties
Vars oregano of basiliekruid 
Parmesaankaas

Metode:
Polenta Gnocchi:
Verhit die melk in 'n kastrol tot amper kookpunt. Giet die semolina of mieliemeel in ‘n straal in die melk in terwyl jy met ‘n ballonklitser vinnig roer. Sodra die mengsel glad is, roer die helfte van die Parmesaankaas en die eiergele by. Kook stadig vr 5 minute. Giet die mengsel oor op kleefplastiek en laat afkoel. Maak langwerpige ‘worse’ met die polenta in plastiek en laat goed styf word in die yskas. Sny in ongeveer 1 cm skywe en pak in sirkels in ‘n bottergesmeerde oondvaste bak. Stip met die 100 g botter en sprinkel oorblywende Parmesaankaas oor. Bak vir 15 min by 180 grade of tot goudbruin.

Salmsous
Braai die blokkies salm net liggies in suurlemoen-olie saam met fyngekapte knoffel. Voeg die groenpeperkorrels en die witwyn by. Laat opkook en eers wanneer dit kook, voeg die room by. Roer deur en geur met sout en ekstra swartpeper. Rasper die skil van beide lemmetjies by die sous in. 

Bedien oor die Gnocchi saam met die vars tamaties en kruie.

Gerookte Tamaties met Aspersies, Sampioene, Jongspinasie en Geposjeerde Eier

Gerookte Tamaties met Aspersies, Sampioene, Jongspinasie en Geposjeerde Eier

Bestanddele:
1 houer gekleurde kersietamaties
2 elk Rooibos en Gewone teesakkies
1 bossie groen aspersies
45 ml First Choice botter
1 pakkie jongspinasie
8 groterige bruinsampioene
4 eiers
15 ml asyn 
Sout en peper na smaak

Metode:
Gebruik ‘n groot kastrol met ‘n stewige deksel en voer die bodem met foelie. Skeur die teesakkies oop en maak ‘n hopie tee in die middel van die foelie. Maak 2 of 3 foeliebolletjies, sit hulle ‘n entjie van mekaar weerskante van die hopie tee. Plaas ‘n bordjie wat in die kastrol pas op die bolletjies. Sny ‘n kruisie in elke tamatie en plaas hulle op die bordjie in die kastrol.
Seël die kastrol so goed as jy kan met foelie, plaas die deksel op en sit dit dan op ‘n warm stoofplaat. Sodra jy rook ruik en effens rook uit die kastrol sien kom, skakel af en verwyder die kastrol van die hitte. Die kastrol se bodem gaan baie warm wees. Moenie die deksel oplig of die foelie verwyder vir ten minste 18  - 20 minute nie.

Stoom die goed gewasde aspersies in ‘n pan met ‘n deksel met omtrent net 3 eetlepels water en 15 ml botter. Sodra dit begin stoom, verwyder van die hitte, maar hou die deksel op.

Stip die sampioene met 15 ml van die botter en maak hulle net vinnig gaar in ‘n braaipan.

Was die jongspinasie en stoom soos die aspersies in ‘n pan met ‘n deksel en 15 ml botter vir amper minder as ‘n minuut. Hulle moet net verwelk.

Maak n mediumgrootte kastrol halfvol water en voeg 15 ml asyn daarby. Bring die water tot ligte kookpunt. Draai die water met ‘n lepel in die rondte sodat ‘n effense draaikolk ontstaan. Breek een een eier in die middel van die draaikolk naby aan die water oop. Posjeer die eiers tot net die wit vorm en die geel nog loperig is. (Dit vorm die sous vir die gereg).

Plaas twee sampioene op elke bord, plaas ‘n hopie spinasieblare daarop, volg op met gekneusde gerookte tamaties en aspersies. Geur goed met sout. Plaas ‘n geposjeerde eier bo-op elke stapeltjie en rond af met sout en peper asook ‘n paar druppels B-well olyfolie.

Balsamiese asyn hierby is ook lekker.

Blikkie Sardiens met geroosterde Pynappelsalsa op bros Poppadum

Blikkie Sardiens met geroosterde Pynappelsalsa op bros Poppadum

Bestanddele:
1 blikkie Portugese sardiens in olie (ongegeur, nie in tamatie)
1 vars pynappel 
1 bossie vars kruisement 
1 kleinerige rooi ui, fyn gekap
2 lemmetjies 
2 E suurlemoengeur Kanola-olie 
2 vars radyse, fyn dobbelsteentjies gesny.
Vars rissie na smaak, fyn gesny
1 K fyngesnyde kool
½ K botterbone, goed gedreineer
1 wieletjie First Choice fetakaas
100 ml First Choice room
2 E gekapte grasuie
4-8 poppadums

Metode:
Sny die pynappel in groot blokke en rooster hulle met ‘n klein bietjie olie in ‘n pan mooi bruin. Kap die pynappel en kruisement fyn en meng dit met die rooi ui en radys. Geur met sout en peper en druk die lemmetjiesap oor die salsa, sprinkel die Kanola-olie daaroor.

Meng laastens die fyngesnyde rissie by. Laat staan die salsa op ‘n koel plek. Verpulp die fetakaas en room tot ‘n gladde sous. Roer die grasuie in. 

Rooster die bone deur hulle in ‘n mediumwarm pan, sonder olie, te laat droogword tot hulle begin oopbars en bros raak. Hou eenkant.

Plaas kombuispapier op ‘n bord en maak die poppadums een vir een vir 1 minuut in die mikrogolf bo-op die kombuispapier bros. 

Trek die sardiens effens fyn, sonder om die ruggraatjies te verwyder. Plaas ‘n bietjie gesnipperde kool, sardiens en dan die salsa op elke poppadum. Eindig met die fetaroomsous en die bros bone.

Swartmossels met Lemmetjie en Klappermelk

Swartmossels met Lemmetjie en Klappermelk

Bestanddele:
800 g vars swartmossels 
1 knoffelhuisie, gekneus en fyn gekap 
1 ui, fyn gekap
1 stokkie sitroengras (lemongrass), gekneus
Skil en sap van 2 lemmetjies 
knippie fyn gemmer
Sout en peper 
100 ml witwyn
1 blikkie klappernelk
Rissies na smaak
Koljanderblare na smaak
Klein bietjie B-well soteerolie vir braai

Metode:
Soteer die uie, gemmer, knoffel en sitroengras liggies in ‘n groot pan of Wok met ‘n deksel. Plaas die mossels alles gelyk bo-op die gesoteerde geurgroente. Voeg die wyn by en plaas die deksel dig op. Stoom die mossels vir 10 minute en voeg die klappermelk by. Reduseer vir ongeveer 6 minute sonder die deksel. Sprinkel die vars lemmetjieskil, rissie as jy dit gebruik en gekapte koljanderblare oor en bedien.

Varkfilet in Cider met Romerige Vinkel-ertjies

Bestanddele:
2 heel varkfilette
3 groot Golden Delicious appels
1 bottel Cider
First Choice Botterblokkies 
B-well Olyfolie 
Kruiesout
Vars tiemie
2 koppies bevrore ertjies
1 groot vinkelknol, gekap
200 ml First Choice room
4 jong preie

Metode:
Sprinkel die vleis met kruiesout. Braai die varkfilet rondom baie goed bruin in ‘n bietjie botter en olyfolie. Sny een appel in klein blokkies sonder om dit te skil en braai dit saam met die vleis effens bruin. Sit die vars tiemieblaartjies by en giet ¾ van die Cider oor die vleis en appels. Plaas ‘n deksel op die pan en stowe tot sag en gaar.

Braai die gekapte vinkel sag in botter. Sit die gevriesde ertjies by en stoom dit net tot dit begin sag word maar nog baie ferm is. Sit die room by, warm goed op en maak dan fyn met ‘n staafmenger. Geur met sout en peper.

Sny die preie oorlangs middeldeur en braai dit bruin aan die snykant in botter. Sny die oorblywende twee appels middeldeur en hol dit effens uit. Vul die vier helftes met ertjieroom. 

Sny die vleis in mooi skywe en rangskik dit rondom elke appel. Reduseer die appel- en cider ‘n bietjie en skep oor die vleis. Bedien saam met die gebraaide preie.

Wenk:
Die oorblywende cider kan jy geur met mosterd en suiker en dit met 1 ml Agar Agar vir elke 100 ml Cider meng en kook vir 1 minuut. Sny in dobbelsteentjies wanneer dit gestol is vir garnering.

Vars Pasta met Romerige Roosmaryn, Baba-steurgarnale, Chorizo en Goudakaas

Vars Pasta met Romerige Roosmaryn, Baba-steurgarnale, Chorizo en Goudakaas

Bestanddele:

Vir die pasta:
400 g koekmeel
4 groot eiers
Sout vir kook

Pastasous:
500 g bevrore baba-steurgarnale (shrimps)
1 Chorizo-wors, in dobbelsteentjies gesny
15 ml B-well suurlemoengeur Kanola-olie
45 ml First Choice botter 
1 takkie vars roosmaryn, gekap
2 ml Roosmaryn kruiesout
250 ml droë witwyn 
200 ml First Choice Room
½ Ronde First Choice Baby Gouda, gerasper

Metode:
Maak die pastadeeg deur die eiers en meel in jou voedselverwerker te pols totdat dit rofweg aanmekaar kleef. Knie effens verder tot dit ‘n gladde deeg vorm. Bedek en plaas in die yskas vir ten minste 15 minute om te rus. Verwerk die pasta deur jou pastamasjien twee maal op elke stelling tot jy gladde pastablaaie het om te sny met die snystuk. Bring 'n groot kastrol water met ‘n handvol sout tot kookpunt. Plaas die gesnyde pasta versigtig in die kokende water, wikkel effens sodat dit los van mekaar kom en kook vir 4 minute. Dreineer, bedruip met ‘n klein bietjie olie en hou warm.

Maak die sous deur die shrimps en chorizo saam met olie en botter effens te braai. Voeg die gekapte roosmaryn en roosmarynsout by en dan die wyn. Laat effens opkook en roer die room by. Reduseer net sodat die sous effens verdik. Roer die gerasperde kaas deur en bedien saam met die Lintnoedels.

Liggerookte Snoek met Vinaigrette Aartappels en Gepiekelde Vye

Liggerookte Snoek met Vinaigrette Aartappels en Gepiekelde Vye

Bestanddele:
4 porsies Liggerookte snoek
2 E B-well soteerolie
2 potjies First Choice suurlemoengeur botter
2 mediumgrootte aartappels, in die skil gekook
Grasuie
150 ml wit druiwe-asyn
50 ml B-well ekstra suiwer olyfolie 
Sout en peper
4 vars vye
200 ml wit druiwe-asyn 
100 ml witwyn 
50 ml witsuiker
5 ml sout
Gedroogde olyfkrummels (opsioneel)
1 pakkie heel suiker-erte (snap peas)

Metode:
Vir die vinaigrette aartappels:
Maak die vinaigrette aartappels terwyl die aartappels nog effe warm is. Trek die skille af en druk aartappels met 'n vurk fyn. Meng aartappels met die 150 ml asyn en ekstra suiwer olyfolie. Geur goed met sout en peper. Knip met 'n kombuisskêr die grasuie so fyn as moontlik by die aartappelmengsel in. Roer deur en laat staan.

Vir die piekelvye:
Verhit die orige asyn, wyn, suiker en sout tot kookpunt. Giet oor die vye in ‘n bakkie of fles sodat die vye heeltemal bedek is. Laat heeltemal afkoel en gebruik. Die vye sal 'n week goed bly in die piekelmengsel in die yskas.

Vir die snoek:
Warm 'n swaarboompan op tot mediumwarm en smelt die suurlemoengeur botter en soteerolie saam. Plaas die vis met die velkant boontoe in die pan. Braai stadig goudbruin en draai net eenkeer om sodat die velkant ook mooi gaar word. Sweet die erte vir 1 minuut in 'n klein bietjie water en botter. Bedien alles saam met die vinaigrette aartappels oor die vis geskep en die vye en ertjies laastens kunstig bo-op.

Aarbei-jalapeno Hoendervlerkies en Aarbei-salsa vir Geroosterde Hoender

Aarbei-jalapeno Hoendervlerkies en Aarbei-salsa vir Geroosterde Hoender

Bestanddele:
16-20 hoendervlerkies, punte afgesny en in 2 
gedeel
Pekelwater: 2 K louwarm water, 3 E sout, 2 E suiker
Sout en peper 
Hoenderspeserye (opsioneel)

Vir die Aarbei-jalapeno konfyt:
100 ml Balsemiekasyn
50 ml sojasous
59 ml Worcestersous
100 ml bruinsuiker 
5 ml sout
1 K aarbeie, grof gekap
(jy kan 1 blikkie aarbeie hiervoor gebruik)
2 takkies kruisement, gesnipper
Vars Jalapeño-rissie na smaak

Vir die vars aarbeisalsa saam met geroostere Tulanie vryloop-hoender:
1 pakkie vars aarbeie
1 klein rooi ui
6 kersietamaties
1 wieletjie First Choice Fetakaas 
4 takkies vars kruisement of basiliekruid 
2 stingels groen ui
Vars Jalapeño-rissie na smaak
Sap van 2 lemmetjies of 1 suurlemoen 

Metode:
Laat lê die vlerkies (ontdooi indien dit gevries was) vir 3-6 ure in die pekel en droog hulle dan goed af met ‘n skoon vadoek. Geur liggies met sout en peper en hoenderspeserye indien jy  dit gebruik. Plaas in ‘n oondbak in ‘n warm (190 grade) oond en bak hulle tot bros en gaar.

Konfyt:
Plaas al die bestanddele in 'n pan en kook sonder deksel af oor redelike warm hitte totdat dit dik en taai is. Neem ongeveer 20 minute. Smeer die vlerkies halfpad deur die bakproses net een keer goed net die konfyt. Bedien met die Aarbei-jalapenokonfyt mildelik oorgegiet en gee vir jou gaste elk ‘n lekker klam jammerlappie.

Salsa:
Maak die vars salsa deur al die bestanddele eweredig gekap te meng met die sap en bedien langsaan jou pragtige bros goudbruin gebakte hoender.

Ontbondelde Cassoulet

Ontbondelde Cassoulet

Bestanddele:
2 - 4 eend dy-en-boudstukke
4 lamstjops
4 - 8 eend/varkworsies
2 stukkies ontbeende Kassler-tjops
1 K witwyn
1 blikkie gekapte tamaties
1 blikkie botterbone of rooi gespikkelde bone
Sout, peper en ‘n bietjie suiker na smaak

Metode:
Braai die eendstukke goed bruin en voeg die worsies en gesnyde Kassler-tjops by. Voeg die wyn en tamatie by en prut stadig. Braai die lamstjops met sout en roosmaryn bruin tot mediumgaar. Hou warm. 

Dreineer en spoel die bone onder lopende water. Voeg dit by die stowemengsel. Stowe vir nog sowat 20 minute en skep dan die stowevleis en sous oor elke lamstjoppie. Garneer met ‘n rosie wat jy met ‘n eendrepie gedraai het en bedien daam met geurige koeskoes.

Blitsgebraaide Lamskenkels met Kruisementsous en Growwe Koeskoes

Blitsgebraaide Lamskenkels met Kruisementsous en Growwe Koeskoes

Bestanddele:
4 heel lamskenkels
Sout
Olyfolie

Kruisementsous:
100 ml asyn
125 ml suiker
10 ml sout
1 K gekapte kruisement 

Growwe Koeskoes:
1 K handgemaakte koeskoes 
1.5 K kookwater
5 ml sout
1 wieletjie First Choice fetakaas, gekrummel
50 g First Choice botter 

Metode:
Voorverhit die oond tot 190 grade C. Smeer die vleis goed met olyfolie en sout. Braai goudbruin aan al die kante in ‘n baie warm steakpan. Bak die skenkels vir 35 tot 45 minute tot mediumgaar. Baktyd sal afhang van die grootte van die skenkels.

Sout die koeskoes en giet al die water by. Vlok dit goed met ‘n vurk. Laat staan ten minste 20 minute. Indien dit nie sag is nie en te droog lyk, kan jy nog ‘n klein bietjie kookwater deur roer. Roer die gekrummelde feta deur en verhit voor bediening in die mikrogolfoond.

Kook die asyn, suiker en sout vinnig totdat dit effens stroperig is. Laat koel heeltemal af en voeg die kruisement by. Maak goed fyn met ‘n stokmenger en bedien saam met die skenkels.

Brasiliaanse Mieliemeel-Ontbytkoek

Brasiliaanse Mieliemeel-Ontbytkoek

Bestanddele:
1 K mieliemeel
3 E koekmeel 
3 eiers
1 ½ K melk
1 blik kondensmelk
½ K suiker
2 E botter
¾ K gerasperde Parmesaankaas of Peccorino 
1 t bakpoeier
Versiersuiker en kaneel om bo-oor koek te sprinkel

Opsioneel:
2 lemoene, geskil, gesegmenteer en in blokkies gesny
3 Persimmons (ook genoem Sharon Fruit), in blokkies gesny 
Sprinkel met kaneel
250 ml ekstra dik joghurt en heuning

Metode:
Meng al die bestanddele baie goed tot ‘n gladde beslag vorm. Bak in ‘n groterige braaipan wat in die oond kan gaan, of in ‘n groot tertpan vir 45 minute by 180 grade. Keer uit en bestuif met versiersuiker. Sit voor saam met die vrugte en lekker sterk koffie.

Hawermout plaatkoekies met Bourbon-Esdoringstroop Parmaham en Avokadosmeer

Hawermout plaatkoekies met Bourbon-Esdoringstroop Parmaham en Avokadosmeer

Bestanddele:
1 K gerolde hawermout 
1 K water
1 K melk
1 t sout
3 eiers
1 t gerasperde vars gemmer 
1 t fyn kaneel 
botter en soteerolie vir bak van plaatkoekies 
1 sagte avokado, fyngemaak
½ K Bwell ekstra romerige mayonnaise 
4 groot stroke Parmaham (kan met streepspek vervang word)
50 ml Esdoringstroop (Maple syrup)
100 ml Bourbon (of ander whisky)

Vir afronding:
Vars bessies, sjokolade-knopies, kaneel

Metode:
Kook die hawermout gaar met die water, melk, gemmer, kaneel en sout. Laat effe afkoel.
Roer die eiers goed deur die hawermout en bak plaatkoekies van so om en by drie eetlepels elk.

Meng die stroop en whisky en kook dit vinnig in ‘n oop pannetjie tot dit stroperig raak (so ses minute sal genoeg wees). 

Glaseer die ham deur dit net vinnig op te warm in ‘n pan en die stroop daaroor te gooi. Moenie die ham laat braai nie. As jy spek gebruik, maak die spek eers gaar. 

Meng die mayonnaise en avokado romerig glad. Smeer elke plaatkoekie mildelik met avokadosmeer, rangskik ham daarop en rond af net die bessies en sjokolade-knopies.

‘Gallo Pinto’ (Gespikkelde Hoender) met Romerige Roereier en Salsa

‘Gallo Pinto’ (Gespikkelde Hoender) met Romerige Roereier en Salsa

Bestanddele:
1 K bruinrys
2 K water
1 t sout
1 blikkie swartbone (black beans)
2 t komynsaadjies
1 t grofgemaalde koljandersaad 
4 E Seedoil knoffelgeur druiwepitolie
8 eiers
100 ml room
2 E First Choice botter 

Salsa:
½ rooi soetrissie 
½ geel soerissie
½ ui
6-8 gekleurde kersietamaties 
4 E balsamiese asyn 

Ekstra:
Gebraaide lamsniertjies afgerond met klein bietjie sierrie, room en tiemieblaartjies 

Metode:
Kook die rys sag, maar steeds ferm. Dreineer die bone goed en maak hulle effens droog met 'n skoon vadoek of kombuispapier. Verhit die speserye in die knoffelgeur-olie tot dit efens begin pof. Sit die bone by en braai so bros as moontlik. Meng die rys en die bone.

Klits die eiers en room saam. Smelt die botter in 'n kastrolletjie of pan en maak dit liggies bruin (heerlike geur). Voeg die eiers by en maak romerig gaar oor lae hitte

Maak die salsa deur al die groente in dobbelsteentjies te sny. Geur met sout en peper en roer die asyn deur.

Skep die ‘Gallo Pinto’ in die middel van ‘n geskikte bakkie of bord. Skep roereier bo-op elkeen asook ‘n skeppie salsa.

Bedien saam met die niertjies of enige geskikte ontbytvleis soos spek of wors of maalvleis.

Gebakte Patat met Groen Piesangmoes en Hoenderstokkies

Gebakte Patat met Groen Piesangmoes en Hoenderstokkies

Bestanddele:
4 groterige oranje patats
Seedoil Druiwepit-olie
Sout
6 groen piesangs of so groen as moontlik 
1 ui
1 t borrie
2 E grondboontjiebotter 
2 E First Choice botter 
4 hoenderborsies
2 E Tamatiepasta 
1 t gemaalde komyn
1 t gemaalde koljander
1 potjie hoenderaftrekseljellie
Stokkies vir opryg van hoenderstukkies 

Metode:
Was patats en droog af. Smeer goed met druiwepit-olie en sout. Plaas in oondpan en bak vir 1 uur by 180 grade C.

Meng die aftrekseljellie, speserye en tamatiepasta tot gladde pasta en smeer die hoendervleis daarmee.Sny in repe en dan in blokkies. Gebruik die helfte van die ui en sny stukkies om tussen die hoender op die stokkies te ryg.

Skil die piesangs en sny in groterige stukke. Kook in ‘n bietjie kookwater vir ongeveer 8 minute  tot sag. Giet die water af en druk fyn. Kap die ander helfte van die ui fyn. Braai in botter saam met die borrie. Meng met die piesangmoes. Roer laastens die grondboontjiebotter deur.

Braai die hoenderstokkies gaar en bruin onder ‘n warm oondrooster of op ‘n warm vuur. 

Wanneer die patats sag is, sny ‘n snit oorlangs in die lengte van elkeen en druk aan die kant sodat dit oopbars. Skep piesangmoes daarop en plaas hoenderstokkies bo-op.

Souserige Lensies met Skaapworsies, Blomkoolkluitjies en Skilpadjies

Souserige Lensies met Skaapworsies, Blomkoolkluitjies en Skilpadjies

Bestanddele:
1 k bruin lensies
2 k kookwater 
600 g skaap- of lamswors
150 ml rooiwyn 
350 ml water waarin lensies gekook het
1 potjie beesaftrekseljellie
2 E Tamatiepasta 
6 skilpadjies
1 k fyn blomkoolkrummels, sag gestoom 
¾ k banting broodmengsel
1 eier
100 ml melk

Metode:
Kook die lensies sonder sout in die twee koppies kookwater tot sag, maar ferm. Giet die water af, en hou eenkant. 

Braai die skilpadjies alkant goudbruin en plaas hulle in die oond by 160 grade om verder gaar te word aan die binnekant. 

Braai die wors ook bruin en gaar en sny dit in stukke van ongeveer 3 cm elk.

Druk die blomkoolkrummels fyn en meng dit met die broodmengsel, eier en melk tot ‘n gladde deeg. 

Meng die lensiewater met die aftrekseljellie en tamatiepasta en roer dit deur die worsstukkies en lensies. 

Skep lepels vol van die blomkooldeeg op die lensiebredie en plaas ‘n deksel op die pan. Laat dit stadig stowe vir ongeveer 15 minute.

Bedien in brediebakkies met 'n skilpadjie bo-op as kroon. 

Hoender in Rooiwyn

Hoender in Rooiwyn

Bestanddele:
1.2 kg hoenderstukke
15 ml Seed Oil Knoffelgeur Druiwepitolie 
1 groterige bossie vars tiemietakkies
1 groot bossie platblaar-pietersielie 
2 lourierblare 
200 g streepspek, in klein stukkies gesnipper
1 ui,gekap
1 pakkie knopie-sampioene
12-16 piekeluie, heel, maar skilletjies afgetrek
2 E koekmeel
1 koevertjie tamatiepasta 
1 potjie hoenderaftrekseljellie, opgelos in 250 ml kookwater 
750 ml goeie rooiwyn
1 ½ koppie koeskoes
2 E First Choice botter

Metode:
Kook die hele bottel rooiwyn saam met die aftreksel, tiemie, lourierblare en die helfte van die pietersielie vinnig in ‘n oop kastrol af totdat dit met ‘n derde gereduseer is. 

Braai intussen die hoenderstukke goudbruin in die knoffelolie. Hou eenkant. 
Braai ook die spek, uie en sampioene. Hou eenkant.
Verbruin die heel piekeluie in dieselfde pan. Verwyder ook die uie van die pan.
Smelt nou die botter in die pan en roer die tamatiepasta en koekmeel vinnig hierby in om ‘n pasta te vorm. Roer die helfte van die afgekookte wyn-aftreksel hierby in. Voeg al die gebraaide bestanddele by. Kook dit vir ongeveer  35 minute en vul gedurig die vloeistof aan met nog wynaftreksel totdat al die aftreksel gebruik is.

Berei die koeskoes voor deur ‘n bietjie druiwepitolie of gesmelte botter deur die koeskoes te roer. Voeg dan net genoeg kookwater by om so ongeveer 5 mm water bokant die koeskoes te los. Roer vinnig met 'n vurk. Laat staan vir ten minste 30 minute. Jy kan dit vir 2 minute in die mikrogolfoond stoom om weer op te warm. Kap die orige pietersielie fyn en roer deur die koeskoes. Bedien saam met die hoender in Rooiwyn.

Gevulde Naanbroodjies met Beesfilet, Heuningworteltjies, Sampioenblatjang en Amandelsprinkel

Gevulde Naanbroodjies met Beesfilet, Heuningworteltjies, Sampioenblatjang en Amandelsprinkel

Bestanddele:
400 g beesfilet
Seedoil Truffelgeur Druiwepitolie
Sout en peper
12 heel jong worteltjes
2 E heuning
Sout
2 E water
200 g bruin sampioene, fyn gekap
1 ui, fyn gekap
10 ml Seedoil Truffelgeur Druiwepitolie 
10 ml speserymengsel van fyn naeltjies, neutmuskaat en kaneel
3 E bruinsuiker
2 t sout
100 ml Worcestersous
50 g rou ongeskilde amandels
1 klein bossie vars basiliekruid
1 /2 bol supermark brooddeeg 
Meel vir sprinkel van bakplaat of pizza-steen
First Choice botter vir smeer van broodjies
Roketblare opsioneel 

Metode:
Verhit die oond met pizzasteen of bakplaat tot 220 grade C. Verdeel die brooddeeg in ses eweredige balletjies, druk plat en trek hulle so goed as moontlik in ronde sirkels. Laat ten minste 30 minute rus by kamertemperatuur. Sprinkel jou bakplaat of pizzasteen met ‘n bietjie koekmeel en plaas die deegsirkels daarop. Bak dan die broodjies vir 15 minute tot bros en goudbruin. Smeer dit goed met botter.

Smeer die heel filet met Truffel-olie, sout en peper. Rooster dit medium tot lig en laat rus. Braai die gekapte ui en sampioene saam met die speserye ook in Truffelgeurolie en gooi die Worcestersous en suiker by. Laat dit afkook tot ‘n taaierige blatjang.

Stoom die worteltjies net vinnig met die water heuning en sout oor mediumhitte tot effens sag.

Sny die filet in skyfies en vul die broodjies met al die lae van geure.

Rooibos Kantpannekoekies met Sjokolademousse, Marsepein en Springmielie-praline

Rooibos Kantpannekoekies met Sjokolademousse, Marsepein en Springmielie-praline

Bestanddele:
Pannekoek:
1 k koekmeel
1 t sout
1 k sterk rooibostee, afgekoel
100 ml melk, by rooibostee gemeng
1 E Seedoil natuurlike druiwepitolie
1 eier

Sjokolademousse:
200 g donker sjokolade, gebreek
2 E First Choice botter 
250 ml First Choice Room, yskoud
1 eiergeel
1 eierwit
4 E versiersuiker 

Springmielie-praline:
¾ k wit suiker
1 k gaar springmielies, gesout
1 t kaneel

Marsepein:
1 k versiersuiker
2 k amandelmeel
1 ml roosgeursel (oliebasis) of 5 ml gewone roosgeursel
5 ml amandelgeursel (opsioneel)
15 ml brandewyn (opsioneel)

Metode:
Kantpannekoekies:
Meng koekmeel en sout. Meng eers net genoeg eier en rooibostee met die koekmeel om ‘n gladde pasta te maak. Voeg die eier en olie by. Meng goed tot glad. Voeg genoeg tee by om 'n beslag wat soos dikkerige room vloei, te maak. Plaas in ‘n spuitbottel met nie te groot gaatjie in die tuit nie. Verhit jou pannekoekpan (met ‘n klein bietjie botter en olie) mediumwarm en giet sirkels beslag heen en weer sodat jy iets het wat soos ‘n gehekelde lappie lyk. Bak alkante mooi bruin.

Sjokolademousse:
Smelt die gebreekte stukke sjokolade saam met die botter in jou mikrogolfoond. Roer na elke 30 sekondes tot jy sien dit smelt en meng mooi glad. Roer die eiergeel hierby in. Laat eenkant om af te koel tot kamertemperatuur. Klits die koue First Choice Room styf en vou liggies bietjie vir bietjie by die sjokolademousse in. Plaas in die yskas. Klits die eierwit tot dit punte vorm en klits dan die versiersuiker lepel vir lepel by. Die meringue word laaste deur die sjokolademousse gevou om dit ligter te maak.

Springmielie-praline:
Breek of kap die springmielies fyn. Meng met die teelepel kaneel. Smelt suiker baie stadig in ‘n swaar kastrolletjie totdat dit gladde, deursigtige blink karamel vorm. Sprinkel die springmieliemengsel op ‘n stuk foelie en giet dan die warm karamel daaroor sodat dit ‘n tameletjie vorm en verhard.

Marsepein:
Meng al die bestanddele saam glad. Knie dit effens, rol in ‘n stafie en draai toe in kleefplastiek. Plaas in die yskas. Dit moet ferm wees en glad nie taai nie.

Bedien die kantpannekoekies met die sjokolademousse binne toegerol of slegs in die middel geplaas. Breek die Praline in stukkies en garneer daarmee. Maak met die marsepein rosies of iets dergeliks vir garnering asook vir smaak.

Witvis met Drie Souse

Witvis met Drie Souse

Bestanddele:
Druiwepitolie Mayonnaise:
1 eiergeel
2 E suurlemoensap of witasyn
1 t sout
250 ml Seedoil druiwepitolie
Addissioneel: Vars frambose en 2 t Balsamiese asyn

Bearnaise:
160 g gesoute botter
3 ekstra groot eiergele
1 jong prei of klein uitjie, fyn gekap
2 t gedroogde Dragon
125 ml witwynasyn 

Kaassous met room:
500 ml First Choice Room 
2 k gerasperde Cheddarkaas

4 witvis mootjies (of verdubbel vir hoofgereg)

Metode:
Om mayonnaise te maak:
Plaas die eiergeel,sout en suurlemoensap of asyn in ‘n glasmengbak. Begin deur vier maal met tussenposes ‘n baie klein hoeveelheid (slegs n druppel of 2) olie by die eiermengsel in te klits. Dit sal begin emulsifiseer. Klits goed tussen elke byvoeging. Daarna voeg die olie stadig in 'n dun straaltjie by die mengsel terwyl jy aanhoudend klits. Die mengsel sal dikker raak soos jy die olie byklits. Voeg die frambose en Balsamiese asyn by en klits dit sommer met ‘n vurk by indien jy dit gaan gebruik. 

Wenk: die framboos-weergawe is ook heerlik saam met garnale.

Bearnaise:
Verhelder die botter deur dit te smelt en die skuim wat bo-op gevorm het af te skep. Giet die olie af tot net die melkerige gedeelte oorbly. Kook die asyn, gekapte ui/prei en asyn vinnig af tot dit met twee derdes gereduseer is. Plaas die asynmengsel in ‘n glasmengbak oor ‘n kastrolletjie sagkokende water en klits die eiergele daarby in. Giet die verhelderde botter in ‘n dun straaltjie by en klits aanhoudend tot dit nie meer skuim nie en ‘n glansende dik sous vorm. Hou net warm oor die warm water.

Kaassous:
Begin deur die room in ‘n kastrolletjie tot by kookpunt te verhit. Roer al die kaas gelyktydig by die room en roer glad. Verwyder van hitte en warm net weer op voor gebruik.

Stoom die vismooitjies vir vier minute in ‘n mikrogolfoond en braai net vinnig bruin in ‘n bietjie botter. Bedien saam met vinnig gestoomde jongspinasie en die drie souse versigtig in rytjies oor die vis geskep.

Varkribbetjies met Perske Glanssous

Varkribbetjies met Perske Glanssous

(Bedien met jong aartappeltjies en kits-mayonnaise)

Bestanddele:
6 ryp maar ferm “donut”-perskes 
50 ml Worcester-sous
100 ml appelasyn
50 ml heuning 
15 ml Braaispeserye 
1 mediumgrootte ui, fyn gekap 
1 groot varkribbetjie, los gesny en beentjies aan een kant skoon gekrap (hou die vleis skraapsels)


+- 24 jong aartappeltjies, ongeskil, sag gekook
30 ml First Choice botter
30 ml Seedoil knoffelgeur druiwepitolie
2 hardgekookte eiers 
30 ml suurlemoensap
5 ml sout
5 ml suiker
80 ml Seedoil Natuurlike druiwepitolie

Metode:
Sny die vlees van 2 perskes weg van die pit en kap dit fyn. Meng die res van die bestanddele goed saam met die gekapte perskes. Laat lê die voorbereide ribbetjies ten minste n uur in die marinade en braai dit dan oor die vuur of in ‘n baie warm (200 grade C) oond tot bros en blinkgaar. (Indien jy oor die vuur braai, kook die marinade vir ‘n rukkie en giet dit oor die gaar ribbetjies as dit van die vuur af kom)

Sny die aartappeltjies middeldeur. Braai hulle op die gesnyde kante bruin in die botter en olie. Verpulp die eiers en die res van die bestanddele en gebruik as sous by die aartappeltjies. Garneer met vars gekapte pietersielie.

Boerewors-, Pruim- en Gouda-ontbyttert

Boerewors-, Pruim- en Gouda-ontbyttert

Bestanddele:
600 g goeie boerewors
6 ontpitte pruimedante
3 vars pruime
6 eiers
500 ml First Choice Room 
150 g gerasperde First Choice Gouda
½ First Choice Baby Gouda, gerasper
15 ml Seedoil Truffelgeur Druiwepitolie 

Metode:
Sny die boerewors in 6 ewe lang stukke. Druk een pruimedant amper tot in die helfte van elke stukkie wors. Ontpit die vars pruime en sny in kwarte. Klits die room en eiers saam en roer al die kaas daarby. Smeer 'n pan of tertbak met die Truffelgeur-olie. Maak die worsstukke staan in die pan. Pak die vars pruime tussen die worsstukke. Giet die eier en kaasmengsel versigtig tussen die worsstukke. Indien jy ‘n pan gebruik kan jy dit op mediumhitte vir 10 minute begin gaarmaak en dan in die oond vir nog ten minste 30 minute. 

Laat staan ten minste vir 15 minute voor jy dit sny en bedien.

Peruviaanse Geroosterde Hoender met Tropiese skerpsous

Peruviaanse Geroosterde Hoender met Tropiese skerpsous

Bestanddele:
8 donkervleis hoenderstukke

Marinade:
¼ k wit asyn
¼ k Seedoil druiwepitolie
1/2 gekapte ui
1 toontjie knoffel gepars en fyn gekap
1/2 k olie
Sap van 1 suurlemoen 
2 E paprika

Sout die hoender en marineer ten minste ‘n uur. Bak saam met marinade in ‘n warm (190 -200 g) oond vir 45 minute.


Sous:
4 grenadellas se sap, pitte en vlees uitgekrap
Vul aan met 80 ml water
4 E olyf- / druiwepit lie
1 E suiker
1/2 geel soetrissie 
1-2 lang rooi rissies 
1 bakkie appelliefies 

Metode:
Sny die soetrissie en brandrissie deur en brand swart onder rooster of op ‘n warm plaat. Sweet onder ‘n stuk plastiek. Wanneer dit afgekoel het, trek swart velletjies af en kap fyn. Meng al die sousbestanddele met ‘n staafmenger net vir 'n kort rukkie moenie al die pitte fyn laat word nie. Voeg sout en peper by na smaak.

Bedien saam met vars pietersielie.

Salm met Aarbei-mayonnaise, Wortelblaar-pesto en Botter-geposjeerde Wortels

Salm met Aarbei-mayonnaise, Wortelblaar-pesto en Botter-geposjeerde Wortels

Bestanddele:
Salmkoekies 
200 g vars salm, van die vel afgesny en fyn gekap
2 E gekapte pietersielie
2 E gekapte vars vinkel
2 E klappermeel
1 eier
Sout en varsgemaalde peper

1 vars salmfilet van ongeveer 150 g

50 ml B-well Saut- olie vir panbraai

Aarbei-mayonnaise
6 vars aarbeie
4 E B-well Olyfolie Mayonnaise 
1 E vars suurlemoensap 
1 t gerasperde suurlemoenskil 

Botterwortels
6 jong wortels, verkieslik met ‘n stukkie van die toppe aan 
100 g First Choice botter
Sout

Pesto
2 E gekapte worteltoppe (van die jong wortels gesny)
2 E gekapte vars pietersielie
2 E geroosterde kasjoeneute 
2 E B-well Olyfolie 
1 t sout

Metode:
Was die wortels en sny die toppe af. Hou dit vir die pesto. Smelt die botter in 'n pannetjie met 'n deksel waarin die wortels gemaklik pas en plaas die wortels daarin. Sprinkel met sout. Plaas op mediumhitte en laat stadig in die botter prut vir 15 tot 20 minute.

Meng die bestanddele vir die salmkoekies sorgvuldig en vorm mooi ronde koekies. Panbraai dit liggies in ‘n klein bietjie van die B-well soteerolie tot goudbruin en net ferm.

Panbraai ook die salmfilet in 'n bietjie soteerolie of B-well Olyfolie en geur dit met sout en peper.

Maak die aarbeie fyn met 'n staafmenger saam met die mayonnaise, suurlemoensap en -skil sodat dit 'n mooi pienk sous vorm.

Druk met 'n vysel en stamper die neute, worteltoppe, pietersielie en olyfolie fyn sodat dit bymekaarkom soos 'n growwe groen Pesto.

Rangskik vir elke persoon 2 salmkoekies saam met 'n repie salmfilet en wortels en bedien met die aarbei-mayonnaise en wortelblaar-pesto daarby.

Pof-Ommelet met Feta, Bloubessies en Neute

Pof-Ommelet met Feta, Bloubessies en Neute

Bestanddele:
8 ekstra groot eiers, geskei
2 E water
Sout en peper
1 tot 2 wiele First Choice Fetakaas
1 koppie bloubessies
100 g amandels of haselneute of 'n mengsel van die twee
Vars Dillekruid of Vinkel 
B-well Canola Cooking Spray 

Metode:
Verhit die oond tot 165 grade C. Klits die eiergele liggies met sout en water. Klits die eierwitte styf, maar nie droog nie, saam met nog 'n knippie sout. Besproei 4 medium ommeletpannetjes of een groot ommeletpan met kleefwerende sproei. Roer 'n klein bietjie van die gele deur die eierwitte en vou versigtig die res van die gele deur die witte sonder om dit te veel te meng. Die mengsel moet nog baie pof, maar 'n egalige liggeel wees. Verdeel die mengsel tussen die vier voorbereide pannetjies of giet in die groot pan. Plaas op mediumhitte totdat die onderkant ferm en mooi goudbruin lyk as jy 'n kant versigtig oplig. Plaas in die oond vir 8 tot 10 minute en bedien binne ‘n paar minute saam met die vulsel, binne in toegevou of bo-op mooi versprei en besprinkel met die vars gekapte dillekruid of Vinkel.

Vulsel:
Kap die neute of druk dit effens fyn in 'n vysel. Kap die bessies en die feta saam op ‘n plank, sodat die sap van die bessies deur die fetakaas geabsorbeer word. Meng dan die neute hiermee.

Pizza met Vark Picanha, Vars Mozzarella, Heuning en Granaatstroop

Pizza met Vark Picanha, Vars Mozzarella, Heuning en Granaatstroop

Bestanddele:
1 bol supermarkdeeg
Klein bietjie koekmeel 
Vars Mozzarella-balletjies
300 g Vark Picanha-steak
Braaispeserye
50 ml suurlemoengeur druiwepitolie
150 ml JHG granaatsap
50 ml heuning
100 g First Choice gerasperde Cheddarkaas
200 ml geblikte gekapte tamaties 
2 E Tamatiepasta 
50 ml JHG Heuning 
2 t gedroogde oreganum
1 t sout
Vars Granaatpitte en suringblaartjies vir garnering 

Metode:
Verhit jou pizzasteen in die oond tot 230 grade Celcius. Smeer die vleis met Braaispeserye en druiwepitolie. Verbruin in ‘n pan en bak nog sowat 20 minute in die oond. Haal die vleis uit en laat rus onder foelie.

Verdeel die deeg in 6 eweredige grootte bolletjies en rol dit langwerpig en so dun as moontlik op ‘n meelbestrooide oppervlak uit. Plaas op die pizzasteen en bak vir 6 minute. 

Kook die geblikte tamaties saam met die tamatiepasta, 1 E heuning, sout en oreganum vinnig saam tot ‘n dikkerige smeer. Smeer elke pizza-stuk met tamatiesmeer, sprinkel met n bietjie gerasperde Cheddarkaas. Sny die vars Mozzarella in dun skywe en verdeel tussen die pizza-stukke. Bak vir nog 6 minute.

Sny die vleis in dun skyfies en rangskik dit op die pizza wanneer dit uit die oond kom. 

Kook die Granaatsap saam met 50 ml heuning totdat dit dik en stroperig raak. Laat afkoel en bedruip die pizzas daarmee. Garneer net granaatpitte en suringblaartjies 

Blindevinkies met Pynappel, Spek en Rooiwyn

Blindevinkies met Pynappel, Spek en Rooiwyn

Bestanddele:
600 g wildsvleis steak stukke
1 blik pynappelringe
1 x 200 g  pakkie streepspek
4 agurkies gehalveer
1 ui, gekap en bruin gebraai
30 ml sterk mosterd
50 ml Seed Oil Knoffelgeur Druiwepitolie 
15 ml tamatiepasta
1 potjie bief-aftrekseljellie
250 ml kookwater
100 ml rooiwyn
2 lourierblare 
20 ml bistopoeier
4 roosmaryntakkies

Metode:
Halveer elke steak deur die dikte van regs na links. Die heel belangrikste stap is om dit dan met ‘n vleishamertjie dunner te kap. Smeer elke stuk met mosterd en plaas ‘n reep spek daarop. Sit op elkeen ‘n halwe pynappelring en ‘n halwe agurkie. Rol stewig op en steek vas met ‘n stokkie. Verbruin die blindevinkies in die pan waarin die uie gebraai is met die druiwepitolie. Meng die kookwater, stroop van die ingemaakte pynappels, aftrekselpotjie, rooiwyn, tamatiepasta, bistopoeier en lourierblare. Plaas die roosmaryntakkies laastens bo-op. Giet dit oor die blindevinkies, bedek die pan en stowe vir ongeveer 25 minute.

Basmatirys:
1 k basmatirys
3 k kookwater
15 ml sout

Metode:
Bring die rys en gesoute kookwater tot ‘n goeie rollende kook in ‘n groterige diep kastrol sodat dit nie maklik oorkook nie. Kook sonder deksel vir 12 minute en giet al die water af.
Plaas ‘n skoon vadoek op die rys en sit die deksel op die kastrol. Plaas op die stoofplaat op die heel laagste stelling tot bedieniningstyd.

Blikkies Sardien en Gerookte Mosselsop

Blikkies Sardien en Gerookte Mosselsop

Bestanddele:
1 mediumgrootte ui, fyn gekap
B-well soteerolie
1 van elk klein (155 g) blikkie ingemaakte sardiens in tamatie en tamatie met rissie
1 blikkie gerookte mossels
500 ml groente-aftreksel
250 ml sjerrie
500 ml First Choice Room 

Sprinkel:
3 sprietuie, fyn ringetjies gesny
3 E elk geel en rooi soetrissie, in dobbelsteentjies gesny 
Vars pietersielie, fyn gekap 
Brandrissie na smaak, opsioneel

Metode:
Soteer die ui tot deursigtig en voeg die vis en mossels by. Roer goed met ‘n houtlepel sodat die vis fyn raak terwyl dit saam met die uie braai vir 3 minute.Voeg die aftreksel by en kook vir 6 minute. Voeg die sjerrie by en sodra dit effens begin kook, voeg die room by.  Skakel af en hou net goed warm tot bediening.

Bedien met die vars sprinkel en piepklein vetkoekies of growwe brood.

Gevulde Kalamari met Swartrys-en-spek Risotto en Piekel-papaja

Gevulde Kalamari met Swartrys-en-spek Risotto en Piekel-papaja

Bestanddele:
4 Heel Kalamari, skoongemaak
1 ½ K swart sushi-rys
4 stukkies ontbytspek, fyn gesny 
B-well olyfolie
First Choice botter
500 ml groente-aftreksel
100 ml witwyn
1 ferm papaja, nog redelik onryp
Sout
1 ½ K rysasyn
1 K suiker

Opsioneel as garnering, gebraaide sampioene en vars vye

Metode:
Papajapiekel:
Skil die papaja dun en maak lang linte met ‘n groenteskiller. Sprinkel goed met sout. Laat kook die suiker en asyn vinnig op sodat die suiker oplos en laat koel dit heeltemal af voordat jy dit oor die papajalinte giet. Plaas in die yskas vir 2 ure.

Risotto:
Braai die rys eers in ‘n bietjie olie en botter saam sodat elke korreltjie mooi met olie bedek is. Voeg die spek by en braai ongeveer 3 minute. Begin nou die aftreksel byvoeg en deurroer totdat dit heeltemal geabsorbeer is. Voeg die wyn intussen ook by. Roer deurentyd tot die rys sag, maar nog ferm is. Jy kan een koppie warm water byderhand hou indien jy voel jy het meer vloeistof nodig. Laat afkoel en stop die Kalamaribuise met die risotto. Steek elkeen goed vas met tandestokkies. Blitsbraai die gevulde buise alkante in botter en olie sodat dit net ferm en gaar is. 

Rangskik papajalinte op opdienborde. Sny die buise oop, verwyder die stokkies en plaas dit versigtig op die linte.

Bruin Uiesop met Murgbene en Biltong

Bruin Uiesop met Murgbene en Biltong

Bestanddele:
4 groot uie, in ringe gekerf
15 ml B-well Kanola soteerolie vir braai
15 ml First Choice botter
2 E koekmeel 
2 beesvleis aftrekseljellie-potjies
600 ml kookwater
4 groot murgbene
½ koppie First Choice gerasperde Cheddarkaas
4 snye Franse brood, 2 cm dikte gesny
100 g biltongpoeier 

Metode:
Plaas die uie in 'n swaarboomkastrol op mediumhitte. Sit olie en botter by en sprinkel die koekmeel oor. Verbruin stadig tot goudbruin. Voeg die aftrekseljellie en kookwater by. Kook die sop vir 10 minute stadig. Braai die murgbene goudbruin en gaar met ‘n bietjie sout. Hou warm. Verdeel die kaas tussen die snye brood en rooster dit tot goudbruin in die oond. Bedien sop met ‘n murgbeen en ‘n kaasbroodjie bo-op. Sprinkel laastens die biltongpoeier oor elke porsie sop.
Copyright © Ontbytsake 2018 - All rights reserved.  |  Privacy Policy  |  Terms & Conditions
 site