By continuing, you are agreeing to our Terms and conditions as well as our Use of Cookies.

Dawie Roodt

Dawie Roodt

Dawie Roodt is al anker-aanbieder van Ontbytsake sedert die eerste program amper 18 jaar gelede die lig gesien het. Hy is ‘n welbekende ekonoom wat gereeld in die media aangehaal word oor verwikkelinge op die ekonomiese front. Hy is bekend daarvoor dat hy moeilike ekonomiese begrippe maklik verstaanbaar kan maak vir leke. Dawie is ook besonder uitgesproke oor ekonomiese sake en gee nie om om die hoogste gesag van die land aan te vat wanneer dit daarby kom nie.

Dawie is ‘n opregte Laevelder, gebore in die destydse Warmbad en het grootgeword in Tzaneen in Limpopo. Hy het sy BCom en BCom honneursgrade deur Unisa verwerf terwyl hy in die weermag was. Daarna het hy sy meestersgraad in Ekonomie met lof by RAU (nou UJ) verwerf.

Sy eerste werk was as ‘n rekenmeester by AVBOB en daarna as interne ouditeur by Trustbank, waarna hy as ekonoom by die Reserwebank begin werk het. Hy was ook al Ekonomiese redakteur van ‘n finansiële tydskrif en het vir ‘n aantal aandelemakelaars gewerk. Dawie is vandag ‘n direkteur en die hoofekonoom van ‘n genoteerde maatskappy, die Efficient groep, waarvan hy ‘n stigterslid is.

Dawie is ‘n avonturier en bok vir sports. Hy doen graag uithou-wedrenne oor die wêreld heen en het al aan die Baikal-ysmarathon in Rusland deelgeneem.

Op 'n persoonlike vlak, is Dawie getroud met Marina en hulle het ‘n tweeling dogtertjies, Daria en Yulia, wat nou 7 jaar oud is. Hy het ook ‘n dogter, Danielle en seun, Kristoff, uit ‘n vorige huwelik en het onlangs oupa geword van klein Sebastian wat in Maart gebore is. 

By Ontbytsake is Dawie die een wat daardie ekstra bietjie pret aan die program verskaf. Hy is nie bang om iets nuuts te probeer nie en dis altyd lekker om te sien hoe Dawie gaste kan laat ontspan en uit hulle kassie laat klim. Dawie is ‘n mense-mens met ‘n opgewekte persoonlikheid en ‘n energie wat aansteeklik is. 

Eloise Cupido

Eloise Cupido

Eloise Cupido is ‘n veeltalige en veelsydige aktrise, TV-aanbieder, sanger, skrywer en seremoniemeester. Sy is Frans, Duits, Engels en natuurlik haar moedertaal, Afrikaans, magtig. Sy is gebore en getoë in die klein plattelandse dorpie Montagu, in die Weskaap en is al van kleins af kunssinnig. Sy het haar BA Drama graad aan die Universiteit van Pretoria verwerf met Frans en Duits as ekstra tale.

As TV-aanbieder, is Eloise welbekend vir haar werk in ‘Athletics Alive’, ‘Invent Yourself’, ‘Belboks’ ( ‘n regstreekse Musiekvideo versoekprogram) en die Leefstylprogramme: ‘Pasella’, ‘Kwêla’ en ‘Artcha’.

As TV-aktrise was Eloise in die internasionaal bekroonde ensemble mediese dramareeks, ‘Jozi H’, in ‘Vetkoekpaleis’ en ‘Generations’ te sien. Sy het ook rolle in ‘Die Vierde Kabinet’, ‘Arsenaal’, ‘It Rained Last Night’ en ‘Home Affairs’ vertolk.

Internasionaal is Eloise bekend vir haar werk in twee Duitse films, KöNIG OTTO vir SAT 1 en A SUMMER IN NEW ENGLAND vir ZDF. Sy verskyn ook in die films soos DOOMSDAY (met Rhona Mitra en Bob Hoskins), BEAT THE DRUM, THE LONG RUN, HIJACK STORIES en SHARK ATTACK.

Eloise is deesdae ook bekend as ‘n brilljante komediant! Sy was te sien in ‘Spekskieters’, ‘Kompleks 2’ en ‘Proesstraat’ en meer onlangs, COLOUR TV.

Die groot eer het Eloise in 2011 te beurt geval om die Aankondigingseremonie vir die 2018 Winter Olimpiese Spele aan te bied, saam met Jonathan Edwards (voormalige Olimpiese en Wêreld Kampioenskap Goue medalje wenner in die Driesprong).

Sy het in 2014 haar debuut musiekalbum, ‘Girl van die Klein Karoo’, bekend gestel. 

Eloise is in 2016 getroud met Chris, haar ‘Kiwi’, soos sy hom noem en het 'n drie-jarige seuntjie wat haar op haar tone hou. 

By Ontbytsake is Eloise die 'professionele' een soos Dawie haar noem... sy hou die dinge bymekaar, maar is geensins op haar mond geval nie. Haar vrolike, opgewekte geaardheid sorg vir 'n vars bries waar ookal sy haar bevind. 

Leon Gropp

Leon Gropp

Leon Gropp is 'n bekroonde kitaarspeler en musikant en is al van jongs af versot op musiek. Hy het vir so lank as wat hy kan onthou, in kore en ander sanggroepe gesing. Hy het egter eers in matriek vir die eerste keer met die kitaar kennis gemaak en was dadelik verlief. 

Dié Pretorianer het die professionele wêreld van musiek amptelik betree as deel van ’n mansgroep, Hi-5, wat die land platgetoer het en selfs ’n optrede saam met Nataniël in die Royal Albert Hall in London gedoen het. In 2007 het hy deel geword van die kitaarduo, CH2, wat oor die afgelope tien jaar ’n hele rits toekennings gewen het, waaronder Vonk-, SAMA- en Ghoema-toekennings vir Beste Instrumentele Album, en ook by die grootste feeste in die land opgetree het.  

Hy het ‘n Woordtrofee vir sy konsep-album ROOIDAG (NP van Wyk Louw getoonset en gesing) ingepalm gedurende 2018, maar het in 2019 besluit dat dit tyd is om sy solo-sangloopbaan ’n kans te gee en sy eerste solo-enkelsnit en musiekvideo vir BAKENLIG is bekend gestel.  Dit het nie net vir die luisteraars ‘n nuwe kant van hom gewys nie,  maar ook vir dié talentvolle musikant ’n stewige plek, as sanger, gevestig in die Suid-Afrikaanse musiekbedryf. 

Wanneer hy nie op die verhoog is nie, is hy ook betrokke by ’n program wat personeel binne groot besighede help om verandering te hanteer. Saam met veranderingsbestuurkenner, Jaco Boëttger, reis hy die land en wêreld vol om mense in die werksplek te inspireer. Verder is hy ook ’n pa en man, wat dit geniet om tyd saam met sy gesin deur te bring. Hy is getroud met Martelize en het twee klein dogtertjies en 'n seuntjie op pad...

As jy hom uitvra oor sy gunstelingmusiek, verklap hy: 

“Ek is maar ’n ‘sucker’ vir goeie harmonie. So enige musiek waarop ’n mens lekker kan harmoniseer is vir my mooi. Daar is ’n magdom plaaslike musikante wat my daagliks beïnvloed en inspireer, soos Joshua na die Reën, Elvis Blue, Coenie de Villiers, Loki Rothman en die lys gaan aan.” 

Internasionaal is dit kunstenaars soos Sting, Coldplay, U2 en vele ander wat ook ’n groot invloed op sy musiekstyl gehad het.

By Ontbytsake is Leon die aanbieder van die Weervoorspelling, Landbounuus, Opkomende Fokus en Sakefokus, maar hy hou veral vir Dawie op sy tone met kwinkslae en sy skerpsinnigheid. 

Corli Botha

Corli Botha

Corli Botha se slagspreuk is 'Let your taste buds explode'. Dié veeltalige kos-, koek- en nagereg-'entertainer', bekende sjef, Koekedoor Seisoen 2-wenner, Gesig van Rooibos 2018, sakevrou, resepteboekskrywer, entrepreneur, produkambasadeur en eienaar van Corli's Kitchen is beslis besig om haar merk te maak in die voedselwêreld.

Sedert Corli kan onthou bak en kook sy en is dit nog altyd  haar passie. Na 'n twee-jaar verblyf in Frankryk was haar liefde vir kos nog sterker. Sy het haar passie vir kos in 'n onderneming verander wat met die dag groter word en hierdie jaar al 7 jaar oud is. 

Haar belangstelling in kos, bak en kook maak dit vir haar moontlik om 'n besigheid en handelsmerk vir Corli's Kitchen te bou. Na sy die Kyknet Koekedoor Seisoen 2-program gewen het, bou sy aktief aan haar besigheid. Sy het ook 'n reseptboek die lig laat sien en is passievol daaroor om nuwe, innoverende koservarings die lig te laat sien. Sy was ook al die eienaar van 'n koffiewinkel en suksesvolle spysenieringsonderneming. 

Die afgelope vier jaar het Corli gereeld deur Suid-Afrika gereis met kook- en bakdemonstrasies, en ook in baie verskillende nuus,  media, artikels, radio- en TV-reekse verskyn.

Corli is van plan om aan te hou reis, te leer, te groei en 'n sterker handelsmerk te bou en haar vermoëns en horisonne te verhoog om haar kos- en baktalente te bevorder. 

Sy het onlangs 'n nuwe produk 'Corli's Biltong Deli, bekendgestel en is besig met 'n hele paar ander produk-ontwikkelings wat binnekort bekend gestel sal word.

Met haar vermoë om buite die boks te dink en dinge te laat gebeur, beplan hierdie dinamiese energieke en kreatiewe entrepreneur om aan die wêreld te wys dat alles moontlik is met genoeg vasberadenheid, passie, drome en harde werk.

Corli woon saam met haar gesin in Pretoria.
Copyright © Ontbytsake 2020 - All rights reserved.  |  Privacy Policy  |  Terms & Conditions
 site