By continuing, you are agreeing to our Terms and conditions as well as our Use of Cookies.

Dawie Roodt kyk na wat die nuwe partye glo

deur Dawie Roodt in Rapport op 28 April 2019

Dawie Roodt kyk na wat die nuwe partye glo

Vandag bespreek ek ’n paar uitgesoekte nuwe politieke partye. Elke party het my aandag om die een of ander rede getrek.

Moenie dat die Land Party se naam jou onder die verkeerde indruk bring nie, hulle het min te sê oor grond! Dit het ontstaan uit die geledere van die leiers van die Hermanusopstande. Gcobani Ndzongana, leier, is charismaties en welsprekend en ’n voormalige EFF-lid.

Daarom sou ’n mens die gewone populistiese sosialistiese retoriek verwag. Maar nee! Die Land Party het net een ding in sy kop en dis om die ekonomie te laat groei en rykdom te skep. Hoewel hy beweer dat hy die beste van verskillende ideologieë in sy beleid probeer saamvoeg, is sy beleid in wese baie sterk vryemark-georiënteerd.

Van al die politieke partye wat ek van weet, is die manifes van die Land Party die naaste aan werklike klassieke liberalisme. Ek is egter onseker of hulle werklik glo in dit wat hulle sê. Sekere voorstelle, veral oor die finansiële sektor en arbeid, het ’n sterk sosialistiese reuk.

Maar met die regte leiers kan so ’n party in die toekoms ’n unieke rol aan die regterkant van die politiek speel. En indien hulle wel genoeg steun kry, kan hulle ’n nuttige koalisievennoot wees.

Die Good-party meen hy weet wat goed is vir Suid-Afrika. Hy lê klem, tereg, op die ontwikkeling van stede en dorpe, en natuurlik moet almal 'n goeie lewe hê. Hy is ook gekant teen die konfiskering van private eiendom (grond), of so lyk dit nou. Verder is min bekend oor sy ekonomiese beleid. Sover ek kon vasstel is hy sosialisties light.

Maar Good se leiers, o wee! Antie Pat sal enige verkleurmannetjie laat skaam kry. Sy verander darem maklik van waardes en idees. Ek glo niks wat Good sê nie, want Patricia de Lille is die leier. En hierdie leier was alles, en niks, in haar kleurryke politieke loopbaan.

Eers was sy ’n PAC-lid wat wit mense in die see wou jaag. En die grondroof wat sy voorheen vurig gepredik het, stel selfs Juju vandag in die skadu. Toe reken sy die DA is ’n rassistiese party net om later by hulle aan te sluit, maar nie voordat sy saam met die ANC in die bed gespring het nie. Sy het die Onafhanklike Demokrate gestig – en nou Good.

Die Capitalist Party of South Africa (ZACP) of die Pers Koei-party, trek aandag om verskeie redes. Ek is mal oor hul embleem, ’n pers koei. Hulle weet hoe om dit vir publisiteit aan te wend. Waar dit vandaan kom, weet nugter, maar dit stuur ’n boodskap van jeug, veerkragtigheid en van politici wat hulself nie te ernstig opneem nie – soos dit hoort. En hulle verstaan die sosiale media!

Die ZACP beklemtoon dat hulle nie beroepspolitici is nie, en dat hulle reeds buite die politiek suksesvol gevestig is; heeltemal anders as die ander lot. Dié gewone mense wil probleme logies oplos. Ideologies noem hulle hulself kapitaliste, sonder om werklik die betekenis van die woord te verstaan. Hul idees is libertyns: die oppergesag van die reg, beskerming van eiendomsreg, die reg op selfverdediging en die klem op die individu.

Ideologies kan ek min fout vind met die pers koeie. Maar dis waar dit eindig. Hulle het beswaarlik ’n beleid oor enigiets. Dit lyk of ’n klomp slim, jong entrepreneurs mekaar een aand ná joga in die vegan bar ontmoet en besluit het om ’n politieke party te begin, maar sonder om te weet waarvoor hulle hulself inlaat.

Miskien eendag . . .

Die Cape Party stel hom net in die Wes-Kaap verkiesbaar. Hoewel hulle grootliks onbekend is, dink ek hul idee van groter outonomie of selfs onafhanklikheid van sekere provinsies in Suid-Afrika gaan van groter belang word.

Ons is ’n historiese sameflansing van groepe in 1910 deur die Empaaier. Ons verskil in taal, kultuur, godsdiens, ras, etniese groepering . . . Namibië is moontlik “nader” aan die Wes-Kaap as aan KZN.

En namate die Suid-Afrikaanse ekonomie al hoe meer agteruitgaan en die instellings wat die politieke eenheid in stand hou ook verkrummel, vergroot die kans dat die land eendag ook polities uitmekaar kan val. En dis die geleentheid wat die Cape Party sien.

Teoreties sal die Wes-Kaap, wat soos Gauteng meer tot die gemeenskaplike pot bydra as wat hy daaruit ontvang, beter daaraan toe wees op sy eie. Die Wes-Kaap se ekonomie is groter as dié van Namibië, en Namibië kon slaag.

Maar wat dan? ’n Onafhanklike Zoeloeland, Pondoland, Vendaland?

Maar dan weer, waarom nie?
Copyright © Ontbytsake 2019 - All rights reserved.  |  Privacy Policy  |  Terms & Conditions
 site