By continuing, you are agreeing to our Terms and conditions as well as our Use of Cookies.

Fliektyd: 12 Oktober 2019

Deur Leon van Nierop

Wees gewaarsku: JOKER is een van die mees ontstellende rolprente wat ooit gemaak is en het erge kontroversie veroorsaak. Dit loop die bloedige spore van die Joker na wat Batman se grootste vyand was. Maar moenie ‘n superheld-strokiesfilm verwag nie. Dié een is rateltaai en neem jou na die diepste en donkerste hoekies van anargie.   

Word geweld verheerlik en ‘n moordenaar voorgehou as ‘n held in Joker? En hits dit anargie aan? Tog kan rolprente nie altyd oulike, vermaaklike superheld-stories vertel nie. Soms moet dit afdaal na die gruwels van ‘n verloorder se siel wat só geskaad is deur die gemeenskap dat hy wraak neem. Die rolprent bevat tonele van erge geweld wat kan skok, maar dit praat ‘n briljante rolprenttaal wat jou sal bedwelm en meevoer. Dit verduidelik hoekom ‘n depressie-lyer sy haat en frustrasies gewelddadig kan uitdruk. JOKER is uitstekend maar taai. Pasop! 

So naby die einde van die jaar durf ‘n mens al sê: hierdie rolprent is een van vanjaar se grootste teleurstellings. Jy verwag ‘n supersoniese avontuur, maar die fliek se battery is pap ly aan beurtkrag van die brein. GEMINI MAN in 4D-X   se ratte glip heeltyd. 

‘n Vreeslose agent en sluipskutter wil aftree, maar word gejag deur ‘n jonger weergawe van homself. Regisseur Ang Lee gebruik in Gemini Man ‘n tegniek wat hard op die oë is en die brein verveel. Dis interessanter om te soek na die springmielies onder in die boks as om te kyk hoe Will Smith en Will Smith teen mekaar baklei. Dis oppervlakkig met ‘n dun storie en oordadige jaagtonele en spesiale effekte. 
Copyright © Ontbytsake 2019 - All rights reserved.  |  Privacy Policy  |  Terms & Conditions
 site