By continuing, you are agreeing to our Terms and conditions as well as our Use of Cookies.

Fliektyd: 27 Februarie 2021

Deur Leon van Nierop

Ken jy die persoon saam met wie jy woon... of met wie jy getroud is, werklik? Daardie vreemde kyk wat hy of sy soms gee, verberg dit iets boos waarvan jy nog altyd onbewus was? Die reeks BEHIND HER EYES lig die wenkbroue bekommerd, en ondersoek wat agter die oë aangaan. 

‘n Meisie word die assistent van ‘n sielkundige. Eerste fout: ‘n vurige verhouding begin. Dan ontdek sy: die kopdokter is getroud. Tweede fout: sy ontmoet sy vrou “toevallig” en ‘n vriendskap ontstaan. Hierdie driehoek kan tot moord lei. Die aktrise wat die vrou speel, Eve Hewson, het donker poele vir oë en steek ‘n mes in die driehoek. Die reeks is boeiend, anders, verwikkeld, gevaarlik en sal jou laat raai en sweet. BEHIND HER EYES sal jou oë wawyd oopmaak vir verraad. Op Netflix. 

Was dit nou ‘n gesukkel om die titel CRAZY, NOT INSANE in Afrikaans te vertaal. Kortom: die rolprent kyk na die verskil tussen tydelik van jou sinne beroof raak, of rasend kranksinnig wees. ‘n Geleerde sielkundige doen onderhoude met moordenaars om die verskil te definieer. 

Sy lyk na ‘n doodgewone koeksister-tannie wat jy agter die kerkbasaar se tafel sal kry. Maar haar brein is skerp. Sy doen onderhoude met 21 reeksmoordenaars en mense wat die kluts kwytgeraak het, en kom tot ‘n skokkende gevolgtrekking. 

CRAZY, NOT INSANE is anders as ander dokumentêre, want die sielkundige neem haarself nooit te ernstig op nie, maar haar onderwerp is grusaam. Crazy, not insane bring jou in aanraking met jou eie donker hoekies. En wie kruip daar weg? Showmax.

Volgende week ‘n POLITIEKE DRAMA James Corden, asook ‘n grusame riller: The Little Things. Oscarmateriaal. Ek groet tot dan.  
Copyright © Ontbytsake 2021 - All rights reserved.  |  Privacy Policy  |  Terms & Conditions
 site