By continuing, you are agreeing to our Terms and conditions as well as our Use of Cookies.

Jan Harm se bietjie sport

27 Mei 2017

Jan Harm se bietjie sport

Dis tyd vir die IKR Kampioene Trofee oftewel Champions Trophy en ja wanneer dit kom by IKR-toernooie, kry ons as SA-ondersteuners koue rillings wat teen ons ruggraat af karjakker. 

Gelukkig is daar minder pynvolle herinneringe gekoppel aan die Champions Trophy as die wêreldbeker. Om die waarheid te sê ons enigste groot IKR-titel het juis gekom in die heel eerste uitgawe van dié toernooi wat in 1998 in Bangladesh plaasgevind het. 

Sedertdien kon ons nog nooit verder vorder as die semi-finale nie. In die mees onlangse uitgawe van die toernooi, wat ook in Engeland plaasgevind het gedurende 2013, het ons ons rieme lelik styfgeloop teen die tuisspan in die semifinaal.

AB de Villiers se span sal egter poog om voort te bou op hulle uitstekende vorm van verlede seisoen om sodoende Suid-Afrika se 19 jaar IKR-droogte te verbreek in Engeland. Indien hulle dit kan regkry sal hulle saam met Australië en Indië die enigste spanne word wat dié toernooi meer as een keer kon wen.

Maar met slegs die top agt spanne in die wêreld wat deelneem, gekoppel aan die feit dat ‘n span waarskynlik slegs kan beskostig om een wedstryd te verloor gedurende die hele toernooi, besef 'n mens hoe uitdagend dit is om as kampioene gekroon te word. 

Kom ons hou styf duime vas dat ons manne hulle senuwees kan beheer wanneer dinge begin taai raak om ons bekerdroogte te verbreek. Dit sal darem lekker wees om daai moewiese stigma rondom Suid-Afrike en groot IKR-toernooie summier nek om te draai. 
Copyright © Ontbytsake 2017 - All rights reserved.  |  Privacy Policy  |  Terms & Conditions
 site