By continuing, you are agreeing to our Terms and conditions as well as our Use of Cookies.

Jan Harm se Bietjie Sport

25 Augustus 2018

Jan Harm se Bietjie Sport

Nou ja, hier is hy dan; my heel laaste “Bietjie Sport” op Ontbytsake. Ek hoop nie julle gee om nie, maar ek het besluit om sommer ‘n paar van my gunsteling oomblikke en sportsterre van die afgelope paar dekades met julle te deel. Wie weet, miskien is daar ‘n paar wat ook jou gunstelinge is.

My gunsteling oomblik is eintlik ‘n trio van oomblikke wat oor ‘n tydperk van 22 jaar strek. Eerstens was daar Ernie Els se Amerikaanse Ope oorwinning by Oakmont in 1994. Dan natuurlik die Springbokke se Wêreldbeker oorwinning in 1995 en laastens Wayde van Niekerk se wêreldrekord 400 meter goue medalje tydens die 2016 Olimpiese Spele.

My gunsteling oomblik wat ek in lewende lywe ervaar het was Morne Steyn se monster strafskop wat die Britse en Ierse Leeus gesink het op Loftus in 2009.

My gunstelingspan bly maar my ou Leeutjies – ek ondersteun die Rooibontes al van ek ‘n klein tjokker was en Naas ons so disnis geskop het, terwyl my gunsteling sportsterre weereens ‘n hele podium sou vol staan met Ernie, Stefan Edberg en Roger Federer wat almal op die boonste trappie staan.

Die ongelooflikste resultaat wat ek ooit aanskou het was die Proteas se 438 wedstryd teen Australië en ek dink AB de Villiers is die mees talentvolste speler wat ek in aksie gesien het.

Usain Bolt was definitief die mees opwindendste terwyl Serena Williams en Tiger Woods in sy gloriedae die mees dominerende spelers was.

En as ek net een sportgeleentheid nog sou kon bywoon, dan sal dit ‘n toets wees tussen die Bokke en die All Blacks op die Park met Hennie le Roux wat vir Danie Gerber oorstuur vir die wendrie in die doodsnikke.

So daar is dit. My sportstorie is uit. Ek wens julle almal nog jare se onvergeetlike sportoomblikke toe.
Copyright © Ontbytsake 2018 - All rights reserved.  |  Privacy Policy  |  Terms & Conditions
 site