By continuing, you are agreeing to our Terms and conditions as well as our Use of Cookies.

Cyril moet twee gifbekers drink en nie sterf nie...

Tim se mening 17 Maart in Rapport

Cyril moet twee gifbekers drink en nie sterf nie...

Cyril Ramaphosa het duidelik sy hande vol om raserny in die ANC te beperk en te bestuur. Bepaald moet hy die twee gifbekers wat die Jacob Zuma-faksie hom in die doodsnikke van die Nasrec-konferensie in die hand gestop het, so drink dat hy nie daarvan sterf nie. En die proses die land saam met hom. Ons praat van die Grondwet-wysiging om te onteien sonder vergoeding en die nasionalisering van die Reserwebank.

Dis duidelik watter spel sy opponente (lees Zuma se proksies) in die ANC-binnekring speel. Hulle weet Ramaphosa was en is gekant teen albei dié stukke sotlikheid en hulle hoop hy sal sloer met die implementering daarvan. Dié “versuim” sal dan ingespan word om hom te herroep as ANC-hoofleier – bes moontlik by die party se nasionale hoofraadsvergadering in 2020.

Ramaphosa se strategie is om ‘n platform te bou vanwaar hy die aanslag op sy leierskap kan afweer. Toegewings is deel daarvan. Dis riskant, maar wat is sy alternatief? Politiek is die kuns van die moontlike.

Voorverlede week se aankondiging uit die bloute oor die nasionalisering van die Reserwebank kan teen dié agtergrond gesien word. Die kritieke vraag is hoe onafhanklik is die Reserwebank; nie wie besit die bank nie. Sy aankondiging het die Rand afgedruk, maar nie laat inplof nie. Was nogal veelseggend om te sien hoe ekonome en sake-ontleders vir Ramaphosa opgekom het toe die mini-bom bars. 

Die president weet seker, om bofbaltaal te gebruik, “next strike and you’re  out”. Die onus is nou op hóm om die Reserwebank se onafhanklikheid en status tot die laaste druppel bloed te verdedig.

Die grond-kwessie gaan ‘n harder neut wees om te kraak. In die swart gemeenskap is dit omgeef van veel meer emosie as die vraag wie besit die Reserwebank. Die ANC, totaal gestroop van intellektuele veerkrag en politieke kreatiwiteit, het toegelaat dat die piepklein EFF hom totaal uitmaneuvreer oor grond. By Nasrec het Span Zuma, wat net-net die ANC se 30-persent slaagsyfer in dinkwerk gehaal het, op die lawaaiwa gespring.

Ramaphosa weet al te goed hoe slu en slinks hulle is. En misstap aan sy kant en dis neusie verby.

Later dié maand kry Ramaphosa die verslag van die paneel van kundiges wat tans kyk hoe die Grondwet gewysig moet word en hoe die onteieningswetsontwerp, wat tans voor die Parlement is, aangewend  kan word om grond te herverdeel.

Bronne na aan die proses sê wat die wysiging aan die Grondwet betref, sal die benadering gehandhaaf word van “maak eksplisiet dit wat reeds implisiet is”. Maar wysig gaan die Grondwet gewysig word. Al word hoe hard beduie die wysiging is eintlik kosmeties, skep dit steeds onrus in die gemoed. Wanneer kom die volgende fundamentele reg wat Grondwet waarborg aan die beurt?  Want as dit eers een keer gebeur het, is die volgende keer mos net soveel makliker.

Die “angel” sal bes  moontlik lê in die wyer aanbevelings. Behalwe dat grond in die besit van die openbare entiteite gevat en uitgedeel kan word, kan ook ander grond in die gedrang kom. Dit sluit in landbougrond wat kerke besit, grond in die besit van myne wat ophou produseer het, sekere stukke grond wat eienaars lank reeds nie meer benut nie en wildplase wat grens aan nasionale parke. 

Adj.-pres. David Mabuza se “vesekering” dié week in die Parlement dat die regering  nie wit kommersiële boere wil “wegstoot” nie en dat hulle “hier moet bly om kos te produseer”, moet seker maar gelees word as kodetaal dat die plan nie is om produktiewe plase af te vat nie. As Mabuza net nie so ‘n sinistere karakter was nie . . .

Waarvoor ons skynbaar wel moet gereed wees, is stewige dosisse vuur-en-swael-retoriek. Allesbehalwe Mabuza se gerusstelling dié week dat die grondstappe geen “rasgegronde strafdaad teen wit grondbesitters” sal wees nie.  Dit sou meer waarde gedra het as dié woorde van Ramaphosa gekom het. 

Verstandige rolspelers wat naby die grondproses beweeg, hoop dat veral boere, hul organisasies en die minderheidsgemeenskappe verby die vurige retoriek sal kyk. Hulle moet eerder fokus op die substansie van die aanbevelings, wat volgens hulle nie radikaal sal wees nie.

So, as ek weer hoor “ek wil graag graag vir Ramaphosa help” teen die EFF en Zuma se besete wildewragtags binne die ANC, sou ek sê help eerder ‘n bietjie om die temperatuur af te bring. Sonder om waaksaamheid te verslap. Inteendeel. Dank die vader dis nie nodig om vir die verdorwe ANC te stem om ‘n bydrae te lewer nie. Want dié is gewoon ondenkbaar.

Die land is by ‘n infleksiepunt waar, as dinge verkeerd loop, ons onderdeur kan wees. Loop dit reg, kan ons weldra op die omdraaipad wees. 
Copyright © Ontbytsake 2019 - All rights reserved.  |  Privacy Policy  |  Terms & Conditions
 site