By continuing, you are agreeing to our Terms and conditions as well as our Use of Cookies.

Ontbytsake Weervoorspelling

22 Julie 2017

Ontbytsake Weervoorspelling

Die Kaap kry normale reën, maar dit is nie die geval vir die tuinroete nie. Daar val ‘n bietjie reën by tye, maar aansienlik minder as die norm. Die Kaap het verlede naweek nie te sleg gedoen met reën nie, en alhoewel ek van die reënvalsyfers gesien het (ander bronne) van tot 60 mm in die berge is dit nog steeds ver van genoeg af. Die sneeu wat geval het sal help op spruite en riviere aan die loop te hou, maar selfs dit gaan nie die waterprobleme oplos in die Kaap nie.

Daar kom ook swak winterreën voor oor die tuinroete en strek tot by KZN. Die kouefront wat Maandag oorland ingeslaan het, het die binneland behoorlik koud gemaak en selfs nou ‘n week later is dit veral nog in die oggende baie koud oor baie streke van die binneland. Ek het nou nie spesifiek gaan kyk nie, maar dit is nou sowat 4-5 oggende in ‘n ry dat ‘n plek soos Upington onder vriespunt draai. Die Vrystaat en die res van die Noord-Kaap is soos normaal koud met temperature tussen -6 tot 8 grade Celcius in die oggende. 

Vir vandag (Saterdag) is daar ‘n kouefront suid-wes van die Kaap, maar dit behoort nie vandag in die Kaap te reën nie. Oor die binneland meestal sonnig deur die dag, maar normaal koud in die nag met sonsopkoms. Sondag skuur die kouefront land-in wat weer die westelike en suid-westelike dele skerp sal afkoel deur die dag, maar die kouefront slaan nie so ver noord in soos die vorige week nie. Daar is ‘n effense bolugtrog oor die binneland wat ‘n paar mooiweerswolke kan maak, maar ek dink nie enige reën nie. 
 
Maandag is daar ‘n koel aanslag van die oppervlakte kouefront oor die oostelike dele van die land met bewolkte toestande in die oggend en sekerlik ‘n paar normale plekke met mis in die oggend. Die oomblik as ons wolke sien, dan sê ons brein vir ons, dit moet koud wees, maar gemeet is die minimums dan nie so koud nie, en die maksimums is laer. Maandag is daar nog pre-frontale toestande oor die Kaap met sonnig toestande met die kouefront wat Dinsdag inslaan oor die Kaap. Dit is weer nie ‘n buitengewone koud front nie met standaard reën oor die Kaap, wat beteken beter reën in die berge soos altyd, minder in die laerliggende dele. Dit lyk of die kouefront ver genoeg noord is vir ‘n bietjie reën oor dele van Namaqualand, maar dit sal nie baie wees nie. Reën tot nou toe oor die blommewêreld was min en die mense begin nou al planne maak om te gaan blomme kyk. Ja, daar was reën, maar dit was kolle en strepe en ek sou graag meer reën wou sien vir ‘n goeie blommejaar.

Woensdag kruip die kouefront in oor KZN en die suidelike Laeveld, maar buiten vir bewolkte weer sien ek  nie noemenswaardige reën nie. ‘n Paar kolle met misreën is sekerlik nie onmoontlik nie. Woensdag is daar weer ‘n baba kouefront wes van die Kaap maar verswak kwaai na Donderdag met net enkele kolle met reën wat kan uitbrei oor die tuinroete tot by Oos-Londen. Oor die binneland behoort dit effe warmer te word veral in die dag, maar nagte bly koud. 

Bietjie koud vir die kinders wat weer terug skool toe moet gaan, maar darem te rof nie. Nou nie heeltemal so lekker vir die Kaap nie, maar ai, dit moet nog baie reën voor die winter verby is. 
Copyright © Ontbytsake 2017 - All rights reserved.  |  Privacy Policy  |  Terms & Conditions
 site