ontbytSAKE is kykNET se tweede oudste kuier- en sakeprogram en op 4 April 2025 het ontbytSAKE 25 jaar op die kassie gevier! Met die leuse “Nou Net Vorentoe” word hierdie silwer herdenking met ’n vars visie gevier, een wat ook in die moderne voorkoms van ontbytSAKE se nuwe stel neerslag vind.
ontbytSAKE
se aanbieders is die spitsvondige ekonoom, Dawie Roodt, die beelskone, Charlene Lackay, die talentvolle, Corli Prinsloo, die musikant, Leon Gropp, en die meteoroloog, Anika de Beer.
In 2021 vier
ontbytSAKE
sy 1000ste program - ’n mylpaal wat nie elke dag gebeur nie en slegs moontlik is as ’n ongelooflike groep mense saamwerk.
Hierdie gewilde oggendprogram op kykNET en kykNET & Kie (kanaal 144 & 145) op DStv, fokus daarop om aan klein- en medium- sakeondernemings nasionale televisieblootstelling te gee. Daarom is
ontbytSAKE
al vir die afgelope vyf-en-twintig-jaar ’n onmisbare deel van baie mense, regoor die uithoeke van Suid-Afrika en Namibië, se naweek-oggendroetine.
Aan die einde van 2021 het die stigter van die
ontbytSAKE
-wenresep, Johann Joubert, afgetree en vandag is die program deel van The B4i Project se filiaal, B4i Productions, met uitvoerende vervaardiger, Louis McLaren.
ontbytSAKE
se logo is verander om die fokus meer op ‘SAKE’ te laat val, wat dan verskillende segmente soos leefstylSAKE, vroueSAKE, ekonomieseSAKE, finansiëleSAKE en soveel meer, insluit.
Jy kan uitsien na in-diepte paneel-besprekings rondom die SAKEfokus met kundiges uit die besigheidswêreld en entrepreneursbedryf wat sakeondernemings en tendense van KMO’s bespreek en raad gee.
Skakel saam met ons in! Ons belowe ’n Saterdagoggend van lekker-lag, saam-gesels, sake en vooruitgang.
ontbytSAKE
– Ons Mense, Ons Besighede, Ons Trots!
ontbytSAKE is 'n gewilde program wat fokus op klein- en medium- sakeondernemings regoor die land.
'n Bietjie van alles – van nuusSAKE, landbouSAKE, ekonomieseSAKE, leefstylSAKE, kultuurSAKE, SAKEfokus, kuierSAKE en SOVEEL MEER!
Aangebied deur Dawie Roodt, Charlene Lackay, Corli Prinsloo, Leon Gropp en Anika de Beer.
Dawie Roodt is
ontbytSAKE
se anker-aanbieder sedert die eerste episode in 2000 uitgesaai was. Hy is 'n welbekende ekonoom wat gereeld in die media aangehaal word oor verwikkelinge op die ekonomiese front. Hy is bekend daarvoor dat hy moeilike ekonomiese begrippe maklik verstaanbaar kan maak vir leke. Dawie is ook besonder uitgesproke oor ekonomiese kwessies en gee nie om om die hoogste gesag van die land aan te vat wanneer dit daarby kom nie.
Dawie is 'n opregte Laevelder, gebore in die destydse Warmbad en het grootgeword in Tzaneen in Limpopo. Hy het sy BCom en BCom honneursgrade deur Unisa verwerf terwyl hy in die weermag was. Daarna het hy sy meestersgraad in Ekonomie met lof by RAU (nou UJ) verwerf.
Sy eerste werk was as 'n rekenmeester by AVBOB en daarna as interne ouditeur by Trustbank, waarna hy as ekonoom by die Reserwebank begin werk het. Hy was ook al Ekonomiese redakteur van 'n finansiële tydskrif en het vir 'n aantal aandelemakelaars gewerk. Dawie is vandag 'n direkteur en die hoofekonoom van 'n genoteerde maatskappy, Efficient Group, waarvan hy 'n stigterslid is wat verlede jaar hulle 20ste verjaardag gevier het.
Dawie is 'n avonturier en 'n bok vir sports. Hy doen graag uithou-wedrenne oor die wêreld heen en het al aan die Baikal-ysmarathon in Rusland deelgeneem, Kilimanjaro geklim en saam met die olifante in Botswana fiets gery.
Op 'n persoonlike vlak, is Dawie getroud met Marina en hulle het 'n tweeling dogtertjies, Daria en Yulia. Hy het ook 'n dogter, Danielle en seun, Kristoff, uit 'n vorige huwelik en is al 'n oupa ook.
By
ontbytSAKE
is Dawie die een wat daardie ekstra bietjie pret aan die program verskaf. Hy is nie bang om iets nuuts te probeer nie en dis altyd lekker om te sien hoe Dawie gaste kan laat ontspan en uit hulle kassie laat klim. Dawie is 'n mense-mens met 'n opgewekte persoonlikheid en 'n energie wat aansteeklik is.
"Corli Prinsloo se slagspreuk is 'Let your taste buds explode'. Dié veeltalige kos-, koek- en nagereg-'entertainer', bekende sjef, Koekedoor Seisoen 2-wenner, Gesig van Rooibos 2018, sakevrou, resepteboekskrywer, entrepreneur, produk-ambasadeur en eienaar van Corli's Kitchen is beslis besig om haar merk te maak in die voedselwêreld.
Sedert Corli kan onthou bak en kook sy en is dit nog altyd haar passie. Na 'n twee-jaar verblyf in Frankryk was haar liefde vir kos nog sterker. Sy het haar passie vir kos in 'n onderneming verander wat met die dag groter word.
Haar belangstelling in kos, bak en kook maak dit vir haar moontlik om 'n besigheid en handelsmerk vir Corli's Kitchen te bou. Na sy die kykNET Koekedoor Seisoen 2-program gewen het, bou sy aktief aan haar besigheid. Sy het ook 'n resepteboek die lig laat sien en is passievol daaroor om nuwe, innoverende koservarings die lig te laat sien. Sy was ook al die eienaar van 'n koffiewinkel en suksesvolle spysenieringsonderneming.
Die afgelope vier jaar het Corli gereeld deur Suid-Afrika gereis met kook- en bakdemonstrasies, en ook in baie verskillende nuus, media, artikels, radio- en TV-reekse verskyn.
Corli is van plan om aan te hou reis, te leer, te groei en 'n sterker handelsmerk te bou en haar vermoëns en horisonne te verhoog om haar kos- en baktalente te bevorder.
Sy is besig met 'n hele paar produk-ontwikkelings wat binnekort bekend gestel sal word.
Met haar vermoë om buite die boks te dink en dinge te laat gebeur, beplan hierdie dinamiese energieke en kreatiewe entrepreneur om aan die wêreld te wys dat alles moontlik is met genoeg vasberadenheid, passie, drome en harde werk.
Corli het twee dogters, is getroud met Waldo en woon in Pretoria."
"Leon Gropp is 'n bekroonde kitaarspeler en musikant en is al van jongs af versot op musiek. Hy het vir so lank as wat hy kan onthou, in kore en ander sanggroepe gesing. Hy het egter eers in matriek vir die eerste keer met die kitaar kennis gemaak en was dadelik verlief.
Dié Pretorianer het die professionele wêreld van musiek amptelik betree as deel van 'n mansgroep, Hi-5, wat die land platgetoer het en selfs 'n optrede saam met Nataniël in die Royal Albert Hall in London gedoen het. In 2007 het hy deel geword van die kitaarduo, CH2, wat oor die afgelope tien jaar 'n hele rits toekennings gewen het, waaronder Vonk-, SAMA- en Ghoema-toekennings vir Beste Instrumentele Album, en ook by die grootste feeste in die land opgetree het.
Hy het 'n Woordtrofee vir sy konsep-album ROOIDAG (NP van Wyk Louw getoonset en gesing) ingepalm gedurende 2018, maar het in 2019 besluit dat dit tyd is om sy solo-sangloopbaan 'n kans te gee en sy eerste solo-enkelsnit en musiekvideo vir BAKENLIG is bekend gestel. Dit het nie net vir die luisteraars 'n nuwe kant van hom gewys nie, maar ook vir dié talentvolle musikant 'n stewige plek, as sanger, gevestig in die Suid-Afrikaanse musiekbedryf.
Wanneer hy nie op die verhoog is nie, doen hy videos en redigering van veral musiekproduksies. Hy is ook 'n gewilde seremoniemeester vir funksies en is 'n regte platjie wat enige geleentheid in pret kan omskep.
Hy is getroud met Martelize en het drie kinder, twee dogters en 'n seuntjie.
As jy hom uitvra oor sy gunstelingmusiek, verklap hy:
"Ek is maar 'n 'sucker' vir goeie harmonie. So enige musiek waarop 'n mens lekker kan harmoniseer is vir my mooi. Daar is 'n magdom plaaslike musikante wat my daagliks beïnvloed en inspireer, soos Joshua na die Reën, Elvis Blue, Coenie de Villiers, Loki Rothman en die lys gaan aan."
Internasionaal is dit kunstenaars soos Sting, Coldplay, U2 en vele ander wat ook 'n groot invloed op sy musiekstyl gehad het."
"Charlene Lackay (voorheen Truter) het in die Boland groot geword, in die Paarl gematrikuleer en na skool by Stellenbosch Universiteit studeer, waar sy haar meestersgraad in Joernalistiek verwerf het.
Haar medialoopbaan het begin as joernalis by Sarie en sy was later subredakteur by die Die Burger-nagkantoor in Kaapstad. Charlene het ook as vryskutskrywer en vertaler vir verskeie publikasies gewerk.
In 2003 het sy as veldaanbieder by die SABC leefstylprogram, Pasella, begin werk wat haar geleentheid gegee het om die land kruis en dwars te verken. "Daar was nog min kerke of stadspleine waarvoor ek nie 'n 'televisie-skakel' gedoen het nie."
Charlene het ook klassieke sanglesse by die Konserwatorium gekry tydens haar studentejare op Stellenbosch. Sy het 'n paar soloproduksies by kunstefeeste gedoen waarvan haar eerste verhoogoptrede, Nagkantoor, saam met Jannie du Toit en Christa Steyn was, met regie deur Sandra Prinsloo. Dit het gegaan oor Koos du Plessis se lewe.
"My styl was akoesties - net stem en klavier. Ek het dit as uitdaging beskou om in die interpretasie van musiek my eie klankprofiel te skep. Ek het die storievertelmoontlikhede van musiek waardeer."
In 2013 het Charlene, net na die geboorte van haar eerste kind, begin met 'n kort radioprogram op RSG, Brabbeltyd, wat gehandel het oor baba en kleuterdinge. Sy het later gevorder tot kontinuiteit en nuuslees en toe deel geword van die Sondagoggend-programaanbieding op RSG.
"Mens leer om op jou voete te dink. En jy leer om die luisteraar te respekteer. Radio is 'n baie intieme medium… regtig 'theatre of the mind'."
Charlene werk ook sedert 2013 as Groephoof vir Volhoubaarheid by Momentum Metropolitan en woon tans in Pretoria saam met haar man en dogters."
Anika is versot op die weer vandat sy kan onthou. Sy het nog altyd 'n belangstelling gehad in wolke en donderstorms en wou verstaan hoe die atmosfeer werk. Sy is gebore in Pretoria, maar sy het haar skoolloopbaan in Potchefstroom voltooi. Na 'n voorgraadse kwalifikasie in Meteorologie, het sy in 2014 ook haar BHons in Meteorologie voltooi aan die Universiteit van Pretoria.
Daarna het Anika by die Suid-Afrikaanse Weerdiens aangesluit in haar eerste rol as lugvaartweervoorspeller. Lang skofte by O.R Tambo lughawe se weervoorspellingskantoor het haar vinnig geleer om onder hoë druk te werk.
Vandaar het Anika in 2017 aangesluit by eNCA as Meteoroloog en televisie-weeraanbieder. Anika het ook haar meestersgraad in Meteorologie aangepak en voltooi tydens haar werk by eNCA.
Aan die begin van 2020 het Anika, aanvanklik deeltyds en later voltyds, by Restore Africa betrokke geraak terwyl sy steeds weer vir eNCA en eNuus aangebied het. Sy is tans steeds betrokke by Restore Africa as deel van die operasionele bestuur.
In 2023 het Anika by
ontbytSAKE
aangesluit as Meteoroloog en aanbieder vir weerSAKE en landbouSAKE. Die aanbieding van landbouSAKE pas Anika soos 'n handskoen, juis weens haar betrokkenheid en belangstelling in volhoubare landbou oor die laaste paar jaar.
Anika woon tans in Pretoria saam met haar man, Abri de Beer en hulle twee Frenchies Remi en Ami. Dit is haar en Abri se droom om hulle gesin eendag verder uit te brei.
Anika spot altyd en sê sy leef letterlik met haar kop in die wolke en in groot dankbaarheid dat sy 'n beroep het wat haar dolgelukkig maak.
Uitvoerende Vervaardiger
Regisseur & Vervaardiger
Produksiebestuurder
Produksiekoördineerder
Redigeerder
stel voor
As jy 'n aanhanger is van ons land se kampioen MMA-vegter, Dricus "Stillknocks" du Plessis, dan moet jy die ontbytSAKE episode kyk! Ons het saam met hom gekuier en het vir julle die 'mens' agter die geharde vegter wys.
Op 2 September het ons gesels oor alles wat lekker en goed is in ons land... 😁
Ons gas was die Good Things Guy, Brent Lindeque en sy aansteeklike optimisme en energie kan ons almal net goed doen.
ontbytSAKE het 1 Jullie saam met die gewilde aanbieder en voormalige Protea Netbalspeler, Vanes-Mari du Toit gekuier en ons het ingeloer by besighede in die omgewing van Middelburg en Emalahleni in Mpumalanga.
Bly op hoogte van ons doen en late
© 2025
